VIAXE AO CORAZÓN DE PORTUGAL

O COLECTIVO DE MULLERES “FRAGA DAS SAÍMAS” VIAXOU ESTA FIN DE SEMANA AO CORAZÓN DE PORTUGAL ACOMPAÑADO POR CINCOENTA E DÚAS SOCIAS AMIGOS E FAMILIARES.

Seguindo coa programación de actividades a desenvolver durante o 1º semestre do ano 2012, aprobadas na súa Asemblea Xeral Anual, a asociación de mulleres rurais “Fraga das Saímas” ven de organizar esta fin de semana unha viaxe ao mesmo corazón de Portugal.

Logo de saír de Santo André de Boimente o sábado de madrugada o grupo de viaxeiros chegou a medio día ao seu hotel de Aveiro para rexistrarse, acomodarse e repoñer forzas cun xantar nas mesmas instalacións do hotel. Xa pola tarde achegáronse ata Coimbra para visitar a cidade dos menhiños, o convento de Santa Clara e dar un paseo en barco polo río Mondego, entre outras. Á noite e xa en Aveiro o grupo disfrutou dunha festa nunha discoteca improvisada no propio hotel, onde brindaron con queimada. Os máis festexeiros continuaron a celebración nos locais de moda situados na Praza do Peixe e arredores do Canal San Roque e nos cafés-terraza do mercado da Hortaliza.

O domingo a mañá e logo do correspondente café os viaxeiros aproveitaron, despois de asistir a unha demostración publicitaria no propio hotel, para visitar á luz do día a cidade de Aveiro e disfrutar dos seus monumentos (o convento de Xesús, situado dentro do Museo de Aveiro, a Igrexa de São Domingo, a Igrexa da Misericórdia, a Câmara Municipal de Aveiro...). Xa á tarde e antes de coller o bus para voltar ás terras de Viveiro, o grupo recorreu os canales desta cidade navegando nos famosos moliceiros (embarcacións de cores típicas de Aveiro), desde onde puideron contemplar as fermosas casas brancas do vello barrio de pescadores e as famosas salinas de Aveiro, entre outras. Algúns membros do grupo aproveitaron para coñecer a cidade tamén desde o bus turístico.

As cincoenta e dúas persoas que acompañaron a asociación de mulleres á veciña Portugal superaron en número as previsións iniciais da Directiva que, ademais,  valorou como moi positiva esta primeira experiencia piloto e se mostrou totalmente satisfeita polo excepcional comportamento, a alegría, o humor e a boa disposición de todas as súas socias así como a dos familiares e a das amigas e amigos que os acompañaron.

Para concluír, dúas cousas:
Primeiro.- aquelas persoas que sacaron fotos durante a nosa visita a Coimbra e Aveiro se queren poden remitirnos fotos desta viaxe ao noso correo electrónico (fragadassaimas@gmail.com) ao obxecto de recollelas todas nun Cd para a montaxe dun vídeo sobre a viaxe ao corazón de Portugal.


Segundo.- recordar ás socias que a vindeira viaxe será o sábado 15 de setembro con motivo da visita, entre outras actividades,  ás instalacións da Fundación Sotavento, onde nos ensinarán o funcionamento destes xigantes de vento.