22.6.15

CLAUSURA DO PROGRAMA DE ACTIVIDADES SOCIOFORMATIVAS 2014-2015

ABRELA, PARAXE ESCOLLIDO POLO COLECTIVO “FRAGA  DAS SAÍMAS” PARA CLAUSURAR O SEU PROGRAMA DE ACTIVIDADES SOCIO-FORMATIVAS (2014-2015) 


Unha vintena de alumnas do Programa formativo da Fraga das Saímas desprazáronse ata municipio do Vicedo para festexar a clausura dos cursos da edición 2014-2015 organizados polo colectivo de mulleres de Sto. André de Boimente .

Entre os cursos desenvolvidos durante a 8º edición do Programa formativo “Fraga das Saímas” caben destacar a IIª edición das Xornadas Micolóxicas e o Iº Obradoiro de Plantas mediciñais, aromáticas e comestibles impartidas por A Estruga. Asimesmo, esta edición volveu contar cun taller de manualidades, cuxas alumnas, da man da súa monitora Mercedes, continuan a sorprendernos coa súa creatividade, interese  e constancia.

As alumnas, logo de disfrutar dun exquisito xantar no chiringuito de Abrela, pasear polo extenso areal branco e fino da praia de Abrela e compartir tempo de anécdotas e divertimento durante unha tarde de sol e bo humor, puxeron a guinda a esta xornada lúdica e de convivencia visitando O Naseiro e a súa contorna.

Antes de dar por rematada a celebración a Presidenta da asociación, Flor Chao, agradeceu a todas as alumnas a súa participación e contribución ao éxito do Programa anual Socio-Formativo da Fraga das Saímas e convidounas a participar na celebración do Día da Socia (sábado 1 de agosto),  que se desenvolverá, un ano máis, no refuxio do Curro do Candaoso, e durante a cal as sócias e convidados poderán disfrutar, entre outras actividades e sorpresas, de sesión vermut e de sesión de baile de tarde-noite coa música do Dúo Suso e a súa DK móvil.



10.6.15

RUTA GASTRO-CULTURAL POLAS RÍAS BAIXAS

A ILLA DE SAN SIMÓN E O PARQUE ARQUEOLÓXICO DE ARTE RUPESTRE DE CAMPO LAMEIRO, ENTRE OS DESTINOS HISTÓRICO-PATRIMONIAL ELEXIDOS POLA ASOCIACIÓN “FRAGA DAS SAÍMAS” PARA VISITAR DURANTE A SÚA VIAXE POLAS RÍAS BAIXAS.


 Máis de medio cento de persoas veñen de percorrer durante esta fin de semana pasada unha ruta gastro-cultural polas Rías Baixas organizada polo colectivo Fraga das Saímas, en colaboración con Viaxes Lucus.

Comezou a andaina cultural deste colectivo o sábado, 6 de xuño,  navegando pola ría de Vigo cun nutrido grupo de amantes da aventura e da diversión, para adentrarse na ensenada de San Simón. Durante esta travesía, un dos guías da ruta foilles desgranando con todo luxo de detalles o acontecer na famosa batalla de Rande librada na ensenada no ano 1702, amosándolles ao mesmo tempo o Centro de Interpretación da batalla de Rande. Durante o traxecto tamén tiveron ocasión de  admirar de cerca o que foi unha das grandes obras de enxeñeiría civil da época como foi  a Ponte de Rande. O grupo desembarcou a mediodía nas Illas de San Simón e San Antón (declaradas no ano 99 Ben de Interese Cultural). Centro da recuperación da memoria histórica e da difusión da cultura de Galicia que se estaba a preparar para acoller esa tarde-noite a cerimonia de entrega de premios da editorial Xeral de novela e literatura xuvenil 2015. Logo de percorrer a pé, cunha guía, este enclave excepcional o grupo de viaxeir@s trasladouse ao Hotel Montalvo Playa (Portonovo) para repoñer forzas e descansar.
Xa pola tarde continuaron a ruta cara ao Concello de Marín para descubrir o Parque dos Sentidos (Granxa Briz), un paradisíaco lugar de máis de 23.000 m2 que conta cunha zona de aventura, lagos, tobogáns e xogos integrados na natureza e un auditorio ao aire libre para gozar de concertos e espectáculos. Lugar no que se divertiron coma nen@s antes de embarcar no barco Latoja para gozar dunha das mellores vistas nocturnas de toda a ría de Arousa, acompañada dunha cea-mariscada con espectáculo de meigas e remantando noite cunha sesión de baile.
A mañá do domingo, o grupo de aventureir@s, dedicouna a facer unha visita guiada ao Parque Arqueolóxico de arte rupestre de Campo Lameiro, que está considerado como o “Atapuerca galega”. Un lugar ideal para coñecer os petroglifos de Galicia, un dos máis destacados conxuntos de arte rupestre ao aire libre do continente europeo, e aproximarnos de maneira rigurosa e didáctica á vida cotiá dos nosos antepasados. Logo de dúas horas de visita a este Parque e ao seu Centro de Interpretación, o grupo fixo un pequeno descanso para xantar antes de poñer rumbo ao concello de Barro para coñecer  e disfrutar do Parque natural Río Barosa, parada fundamental do Camiño Portugués cara Compostela. Un parque cunha excepcional topografía pola que discorre o río Agra en forma de cascada dando forma á Fervenza da Barosa que alcanza 30 metros e ao longo da cal foron construídos 17 muíños formando un complexo hidráulico de grande interese que mesmo @s viaxeir@s máis intrépid@s aproveitaron para explorar.
 
A media tarde, a expedición Fraga das Saímas, acudiu á cita concertada no Val do Salnés coas Bodegas Terras de Lantaño, onde un dos seus responsables fíxolles de guía durante a visita as súas instalacións e aos viñedos. Rematada a visita guiada, @s viaxeir@s foron convidados a unha cata comentada.


Antes de poñer rumbo a Viveiro o colectivo Fraga das Saímas fixo unha última parada para visitar a fábrica de Tartas Casal e degustar os seus produtos típicos, poñendo así  punto e final á ruta gastrocultural programada, según palabras da súa Presidenta ao grupo  co ánimo de ofrecer a nosa xente unha fin de semana intensa e ilusionante e desexando que sigades durante moitos anos practicando esta maravillosa afición de viaxar para descubrir os espectaculares tesouros que acolle a nosa terra.

19.5.15

OBRADOIRO DE PLANTAS MEDICIÑAIS, AROMÁTICAS E COMESTIBLES

O  EXITOSO  OBRADOIRO DE PLANTAS MEDICIÑAIS, AROMÁTICAS E COMESTIBLES DO COLECTIVO “FRAGA DAS SAÍMAS” ACOLLEU A UNHA VINTENA DE PARTICIPANTES


A Asociación de Mulleres Rurais “Fraga das Saímas” ven de organizar esta fin de semana pasada, con grande exito de participación, un Obradoiro de plantas mediciñais, aromáticas e comestibles.
 
Os Obxectivos que persegue o colectivo de mulleres de San Andrés de Boimente coa organización desta xornada formativa, entre outras, son a revalorización do medio rural e o seu patrimonio natural a través da aprendizaxe e o intercambio de coñecementos persoais, poñendo en valor, ao mesmo tempo, o saber popular das participantes máis veteranas.


As máis de vinte persoas que asistiron ao obradoiro impartido por María, de Xardinería Monte Perdido, e a colaboración de  A Estruga, participaron o sábado 16 nunha charla-debate no Centro Sociocultural de San Andrés de Boimente. Durante a primeira parte desta charla-coloquio, celebrada entre as 10.00 e as 11.30 h. a monitora centrouse nos principios activos das plantas o seu tratamento ( recolección, desecación e conservación), as formas de aplicación e as variedades máis comúns da zona. Logo de dar por rematado o debate e as consultas d@s asistentes sobre os usos terapêuticos, culinarios e estéticos das plantas a comitiva saiu polos campos da contorna. Durante esta saída @s participantes aproveitaron para identificar e recoller algunhas das plantas máis comúns da zona (fiunchos, tarrelos, melisa, menta, ortiga...)


Pasadas as 13.30h @s amantes das plantas voltaron ao Centro Sociocultural para xantar e repoñer forzas. Xa á tarde tiveron ocasión de aprender a elaborar cremas e ungüentos, tales como a crema de hipérico, así como infusións e bebidas relaxantes.

No acto de clausura desta Xornada formativa a Directiva ofreceulles @s asistentes petiscos, refrescos e cafés.  Durante este acto de peche @s participantes aproveitaron para intercambiar impresións, experiencias e contactos.

A Directiva agradeceu a participación a tod@s @s asistentes e, en especial, o interese amosado polos  moz@s presentes nesta xornada polo noso rural e as súas posibilidades de emprendemento e futuro.



12.5.15

CELEBRACIÓN DA VIIIª FESTA DAS LETRAS GALEGAS

APLAUSOS E RISAS DO PÚBLICO ASISTENTE Á FESTA DAS LETRAS GALEGAS DA FRAGA DAS SAÍMAS NA REPRESENTACIÓN DA OBRA “O REPARTO” DO GRUPO TEATRAL O BORDELO

 O colectivo de mulleres Fraga das Saímas ven de celebrar este sábado, día 9 de maio, no Centro Socio-Cultural de Sto. André de Boimente, a Festa das Letras Galegas-2015.

Os actos de homenaxe deron comezo ás 20.00 horas coa benvida da presidenta, Flor Chao, que aproveitou para agradecer ás máis de 60 socias, veciños e amigos do colectivo a súa asistencia á Festa da Lingua da Fraga das Saímas e aos que o colectivo feminino quixo adicar esta celebración porque según palabras da presidenta “é de xustiza recoñecer e homenaxear a todas as mulleres e homes que coma vós empregan orgullosos día sí e día tamén o galego, tanto no traballo como na rúa, así como coa familia e cos amigos, contribuíndo a manter viva a nosa lingua. a manter viva a nosa cultura, o que nos leva a manter vivo o noso pobo e a nosa terra”

Acto seguido un dos nenos da parroquia que asistiu á celebración, Brais, recitou  o poema “o idioma” do poeta chairego Manuel María.

Unha vez rematada esta lectura a presidenta deu paso ao Grupo de teatro O Bordelo, que durante máis dunha hora arrincou numerosos aplausos e risas do público coa representación da peza teatral “O reparto” do escritor, director e actor do grupo Francisco Piñeiro. O grupo cervense, que provocou o entusiasmo d@s asistentes á Festa da Lingua, é un grupo veterano que conta con 17 anos de experiencia e máis de 800 representacións e varios premios e certames teatrais de renome dentro do teatro aficionado galego.
vídeo "Gústame o Galego"

Logo desta exitosa representación, a Directiva proxectou o vídeo  “Gústame o Galego”, cuxos protagonistas eran  os propios veciños e socias que participaran no Fotocol Gústame o Galego promovido no 2014 pola Coordinadora de Traballadores de Normalización da Lingua Galega dentro da súa campaña de dinamización do uso do galego. Tod@s @s protagonistas desta campaña foron agasallados cun exemplar deste vídeo.
axenda de bolsillo

Pasadas as 00.00 horas, e logo de rematada a degustación de petiscos e de churros con chocolate, a Presidenta do colectivo Fraga das Saímas clausurou a Festa da Lingua-2015 facendo entrega a tod@s d@s presentes dunha axenda de bolsillo.








21.4.15

OBRADOIRO DE PLANTAS MEDICINAIS, AROMÁTICAS E COMESTIBLES



FRAGA DAS SAÍMAS ABRE O PRAZO PARA ANOTARSE NO OBRADOIRO DE PLANTAS MEDICIÑAIS, AROMÁTICAS E COMESTIBLES


As plantas mediciñais usáronse desde a máis remota antigüedade como tratamento para sanar e tratar enfermidades ao longo da historia do ser humano. Na actualidade os seus principios activos son os protagonistas da maioría dos medicamentos das industrias farmaceúticas.  As plantas aromáticas e comestibles forman parte da cultura popular que soubo encaixalas nun etilo de cociña que non só se preocupa da calidade e o sabor senón tamen da dietética e a nutrición. Saber utilizalas na xusta medida é todo un arte...E agora co colectivo Fraga das Saímas tedes a oportunidade a tod@s vós (socias, amigas, familiares, veciños do concello...) de aprender a identificar e clasificar as plantas medicinais, aromáticas e comestibles e a coñecer cales son os seus usos terapéuticos, culinarios e estéticos apuntádovos ao Obradoiro de Plantas Mediciñais, Aromáticas e Comestibles que imos organizar o sábado, 16 de maio. 
Inscríbite antes de que se esgoten as prazas (máximo 25 alumn@s)!! O prazo remata o 10 de maio!