“O
goberno municipal, e non os veciños, é o que ten que actuar de oficio e esixir responsabilidades
ás empresas madeireiras que desenvolven as súas actividades na nosa parroquia
con neglixencia e sen respecto algún, nin polos bens públicos (camiños municipais,
pistas.) nin polos particulares (fincas,
cerrumes..), e que están a utilizar os
camiños públicos como cargadoiros, provocando a obstaculización do paso dos
vehículos, así como estragos nos diferentes bens con total impunidade”, denuncian membros da
Directiva da asociación de mulleres de Santo André de Boimente.
A ASOCIACIÓN “FRAGA DAS SAÍMAS” RECLÁMALLE AO CONCELLO DE VIVEIRO A
REGULACIÓN DAS ACTIVIDADES DE TALA FORESTAL, DEPÓSITO, CARGA E TRANSPORTE DE
MADEIRA DENTRO DO SEU TÉRMINO MUNICIPAL.
O colectivo de mulleres “Fraga das Saímas” ven de presentar un escrito
no rexistro do concello de Viveiro ao obxecto de solicitarlle ao goberno
municipal o desenvolvemento dunha ordenanza
municipal reguladora das actividades de tala forestal, depósito, carga e
transporte de madeira dentro do municipio de Viveiro.
Logo de ser coñecedoras das queixas de socias,
veciños da parroquia e numerosos viandantes polo lamentable estado dos camiños,
pistas e outros bens protexibles da parroquia de Santo André de Boimente, como
consecuencia das prácticas “pouco responsables e respetuosas” dalgunhas
empresas madereiras, e dado o interese e preocupación amosada polo colectivo
“Fraga das Saímas” pola xestión das actividades forestais na parroquia de Santo
André de Boimente e máis concretamente da tala das súas masas arbóreas, posto que,
entre outras cuestións, as zonas forestais e as zonas de uso residencial da
comunidade veciñal conviven practicamente na mesma unidade xeográfica e asimesmo
a preocupación do colectivo pola protección das persoas, vivendas e
instalacións fronte aos posibles incendios forestais que puideran producirse
debido á proximidade das plantacións ás edificacións, a orografía e a
climatoloxía, a Directiva da asociación de mulleres rurais “Fraga das Saímas”
considerou necesario trasladar este malestar e preocupación ao goberno
viveirense e solicitarlle, entre outros, o desenvolvemento dunha regulación
municipal das actividades de tala forestal, depósito, carga e transporte de
madeira dentro dos termos municipais de Viveiro co finalidade principal de:
- Garantir
a preservación do medio natural e a conservación dos camiños, pistas municipais
e demais infraestruturas e fincas anexas aos lugares da tala que poidan ser
obxecto de deterioros por causa das operacións de corta de madeira, evitando a súa destrución e o depósito de
residuos procedentes das talas, tanto dentro do dominio público como nas
fincas particulares.
- Garantir
a seguridade e a ordenación do tráfico, evitando a ocupación de vías municipais
polas operacións de carga de madeira,
obstaculizando e incluso impedindo o tránsito rodado.
- Obrigar
ao madeireiro encargado da tala como responsable dos danos ocasionados nos
lugares de tala, viais de acceso, instalacións ou demais infraestruturas
anexas, á reparación, no prazo de 48
horas dende a tala da madeira, do
deterioro producido neles, incluíndo a limpeza, retirada ou eliminación de
residuos procedentes da tala e das operacións de carga e almacenamento. E co
obxecto de non ser considerados responsables solidarios destes desperfectos os
propietarios/as das parcelas sobre as que se realice os labores deberían
comunicarlle á administración local o nome da empresa madeireira previamente ao
comezo dos traballos de tala da masa arbórea.