ASOCIACIÓN MULLERES RURAIS "FRAGA DAS SAÍMAS"

"FRAGA DAS SAÍMAS ACUDE Á CELEBRACIÓN DO Iº ANIVERSARIO DA RESIDENCIA GERIATROS

2012-02-05T14:16:00.000-08:00

“O extraordinario traballo desempeñado polas traballadoras/os da Residencia de Maiores é un exemplo de entrega e cariño aos nosos Maiores…manifestou a presidenta da asociación de mulleres "Fraga das Saímas”, durante a celebración do Iº Aniversario da Residencia Geriatros-Viveiro.

UNHA DELEGACIÓN DO COLECTIVO “FRAGA DAS SAÍMAS" ASISTE Á CELEBRACIÓN DO Iº ANIVERSARIO DA RESIDENCIA GERIATROS DE VIVEIRO.

As representantes do colectivo de mulleres“Fraga das Saímas”, xunto con quince socias e familiares acudiron a tarde do sábado, 11 de febreiro, á Residencia de Maiores de Covas para celebrar cos residentes deste Centro o Iº Aniversario da Residencia xestionada por Geriatros -Viveiro.

Durante esta celebración as mulleres do colectivo “Fraga das Saímas” foron convidadas a poñer en práctica a súa habilidade e sorte cos xogos de mesa. Momentos durante os cales tiveron a ocasión de compartir mesa e conversa cos residentes do Centro. Logo dunha merenda todos os convidados, familiares e residentes gozaron co grupo viveirense “Escolma de Meus” que ofreceu unha actuación musical cargada de sensibilidade e humanidade.

A comitiva da asociación “Fraga das Saímas” despedíuse do Centro e os seus residentes pasadas as 19.00 horas, logo de expresarlle á Dirección a súa felicitación polo aniversario e polo extraordinario traballo desempeñado por todas as traballadoras/es do Centro, e que tal como manifestou a presidenta da colectivo de mulleres de San Andrés: é un exemplo de entrega e cariño aos nosos maiores.

CELEBRACIÓN DO Iº ANIVERSARIO DA RESIDENCIA DE MAIORES "GERIATROS-VIVEIRO"

2012-01-28T11:24:00.000-08:00

CONVITE DE GERIATROS -VIVEIRO, AO COLECTIVO DE MULLERES "FRAGA DAS SAÍMAS", PARA A ASISTIR Á CELEBRACIÓN DO Iº ANIVERSARIO DA RESIDENCIA DE MAIORES.

A Directiva do colectivo "Fraga das Saímas" recorda as súas socias que, tal e como xa lles puxera en antecedentes o pasado 21 de xaneiro durante a celebración da súa asemblea xeral anual, o vindeiro sábado 4 de febreiro, a partir das 16.00 horas, terá lugar a celebración do Iº Aniversario da Residencia de Maiores xestionada por Geriatros-Viveiro, á cal temos a honra de estar convidadas as mulleres e socias da entidade "Fraga das Saímas".

Rogamos ás persoas que estean interesadas en asistir a este acto e que aínda non se apuntaron llo comuniquen á nosa presidenta antes do mércores 1 de febreiro.

Moitas grazas!

XA ESTÁ AQUÍ O IIº BAILE DE FARRAPULGAS!

2012-01-26T04:37:00.000-08:00

A Directiva Fraga das Saímas ANUNCIA a todas as súas socias, veciños, amigos e coñecidos que o colectivo de mulleres rurais "Fraga das Saímas" está a organizar a IIª EDICIÓN DO BAILE DE FARRAPULGAS para celebrar o ENTROIDO-2012. Este gran BAILE vai ter lugar o DOMINGO, 26 DE FEBREIRO a partir das 17.00 horas. Así pois, xa podedes poñer a traballar esa grande imaxinación que tedes para pensar cal vai ser o disfrace con que nos ides sorprender este ano. Non só haberá música, baile, pinchos e bebidas senón tamén que teremos premios e sorpresas para as máis atrevidas e festeixas. ESPERÁMOSVOS! APÚNTATE XA.
NON TE ARREPENTIRÁS!

RENOVACIÓN DOS CARGOS DIRECTIVOS DO COLECTIVO "FRAGA DAS SAÍMAS" E APROBACIÓN DO PROGRAMA DE ACTUACIÓNS PARA O 2012

2012-01-23T01:34:00.000-08:00

UNANIMIDADE NA VOTACIÓN DA ASEMBLEA DO COLECTIVO “FRAGA DAS SAÍMAS” PARA A ELECCIÓN DA CANDIDATURA Á XUNTA DIRECTIVA, ENCABEZADA POR FLOR CHAO, E APOIO UNÁNIME AO SEU PROGRAMA DE GOBERNO E DE XESTIÓN.

A asociación de mulleres rurais “Fraga das Saímas” ven de celebrar o sábado, 21 de xaneiro, dúas asembleas xerais no Centro Socio-Cultural que xestiona este colectivo desde o ano 2007.

A partir das 17.30 horas da tarde tivo lugar a Asemblea Xeral Anual Ordinaria, na que as 49 socias asistentes, entre presentes e representadas, aprobaron por unanimidade o informe de xestión e o estado de gastos e ingresos do 2011, Logo de máis dunha hora de exposición pormenorizada, por parte da secretaria, da xestión realizada polas membros da Directiva ao longo do exercicio pasado.

Sen previo descanso, as mulleres do colectivo Fraga das Saímas celebraron deseguido nunha Asemblea Xeral Extraordinaria, con motivo da elección dos cargos da nova directiva para a lexislatura 2012-2016.

A nova Directiva elexida por unanimidade, con 49 votos a favor e ningún en contra, quedou constituída polas seguintes mulleres: Flor Chao (presidenta), Xuxa Rouco (Tesoureira), Gloria (Secretaria), Mª Josefa Rouco (vocal 1ª), Adelina Lorenzo (vocal 2ª). Antes da votación as candidatas, a través da súa secretaria, declararon ante a asemblea que non estaba nas súas mentes repetir mandato e que tan só aceptaban presentar candidatura por sentido de responsabilidade e de compromiso coas institucións e con aquelas socias que están a apoiar este proxecto colectivo desde a súa posta en marcha.

Logo da elección da nova Directiva, a secretaria expuxo o Programa de actuacións e investimentos para o 2012 e unha vez rematada a súa intervención e tralo apoio unánime, por parte da asemblea, ao Programa de actividades a presidenta quixo recordar ás presentes que o programa de goberno da nova directiva seguiría na mesma liña de traballo e cos mesmos plantexamentos de xestión interna e externa que ata o de agora viña desenvolvendo a anterior Directiva.

Entre as actuacións novidosas aprobadas pola asemblea cabe sinalar: en materia de formación: unhas xornadas técnicas sobre cogumelos, unhas xornadas técnicas sobre eficiencia enerxética e clases de baile de Salón. En materia de actuacións para preservar o noso patrimonio e a posta en valor dos recursos naturais: o Proxecto de “Microtoponimia e o Mapa dos nomes”. (1ª Fase), o Concurso de Fotografía “Fraga das Saímas-2012: “os produtos da nosa Nai Terra” e en materia de fomento do coñecemento sobre o patrimonio natural, histórico e artístico de Galiza e outros territorios, resaltar a aprobación dunha viaxe a Portugal e unha visita guiada ao Parque Experimental da Fundación Sotavento (Xermade) e ao parque natural de Marcelle.

Pasadas as 20.00 horas a presidenta da asociación deu por concluída a 2ª asemblea Xeral Extraordinaria e acto seguido, membros da Directiva ofrecéronlles as socias asistentes unha degustación de churros con chocolate.

PARABÉNS DONA JULIA!

2012-01-16T09:19:00.000-08:00

A NOSA SOCIA HONORÍFICA, DONA JULIA VIDAL, CUMPRÍU 102 ANOS.

O pasado sábado, 7 de xaneiro de 2012, a socia honorífica do colectivo "Fraga das Saímas", Dona Julia, celebrou, na súa casa de San Andrés de Boimente, os seus 102 anos en compañía dos seus netos (Luis e a súa esposa, Merche), biznetas (Lorena e Yanira) e a súa nora (Marisa).

Moitos Parabéns!

CONVOCATORIA DE ASEMBLEAS: XERAL ORDINARIA ANUAL E EXTRAORDINARIA DA ASOCIACION DE MULLERES RURAIS “FRAGA DAS SAIMAS”

2012-01-09T06:33:00.000-08:00

CONVOCATORIA ASEMBLEAS: ORDINARIA ANUAL E

EXTRAORDINARIA (ELECCIÓN DA NOVA XUNTA DIRECTIVA)

Estimada socia:

En virtude das facultades que me confire o artigo 15 dos Estatutos da Asociación de mulleres rurais Fraga das Saímas, convócote á ASEMBLEA XERAL ORDINARIA que terá lugar no Centro Social de San Andrés de Boimente, o SABADO, 21 de XANEIRO de 2012, ás 17:00 HORAS en primeira convocatoria e, de ser o caso, ás 17:30 HORAS en segunda convocatoria, e á ASEMBLEA XERAL EXTRAORDINARIA que terá lugar o mesmo día ás 18.00 horas, en primeira convocatoria e, de ser o caso, ás 18.30 horas para debater e tomar acordos sobre os seguintes asuntos da orde do día:

ORDE DO DÍA DA ASEMBLEA XERAL ORDINARIA

Primeiro: Aprobación, se procede, da acta da asemblea anterior.

Segundo: Dar conta de novas altas de socias e reparto, ás mesmas, de copia dos estatutos da Asociación.

Terceiro: Dar conta do estado de ingresos e gastos do exercicio 2011 e aprobación, se procede, do informe de xestión e do balance económico.

Cuarto: Suxestións e preguntas.

ORDE DO DÍA DA ASEMBLEA XERAL EXTRAORDINARIA

Primeiro: Presentación de candidaturas á Xunta Directiva da Asociación de Mulleres Rurais “Fraga das Saímas”.

Segundo: Exposición do Programa de goberno e do Plano de actividades e investimentos para o exercicio 2012 de cada unha das candidaturas presentadas.

Terceiro: Elección da Xunta Directiva da Asociación de Mulleres Rurais “Fraga das Saímas” para a lexislatura 2012-2016

Cuarto: Aprobar, se procede, o Programa de actividades e investimentos e o Orzamento anual de ingresos e gastos para o exercicio 2012.

NOTA INFORMATIVA SOBRE A PRESENTACIÓN DAS CANDIDATURAS Á XUNTA DIRECTIVA

As candidaturas que desexen participar no proceso electoral, poderán presentar, con data límite o 20 de xaneiro de 2012 ás 20.00 horas, ante a actual Directiva a candidatura oficial, de acordo ao artigo 10 dos estatutos da asociación Fraga das Saímas (ver Anexo I.- “modelo de candidatura” na parte de atrás da presente convocatoria)

Calquera dúbida que necesitedes que se vos aclare ou calquera cuestión que desexedes plantexarnos podedes poñervos en contacto coa Directiva no teléfono: 669 250 948.

Dada a importancia que supón para o futuro da asociación o bo desenvolvemento desta convocatoria agardamos a túa presenza e participación nestas asembleas.

Asdo. Flor Chao Requeijo

Presidenta AMMRR “Fraga das Saímas”

ANEXO I.

MODELO DE CANDIDATURA

DONA____________________________ con DNI___________________, socia Nº___ da entidade ASOCIACIÓN DE MULLERES RURAIS “FRAGA DAS SAÍMAS, con CIF: ____________e domicilio social: Morgade, nº 7. CP 27864. San Andrés de Boimente. Concello de Viveiro (Lugo),

EXPÓN QUE:

Primeiro.- con motivo das próximas eleccións das membros á Xunta Directiva da Asociación de Mulleres Rurais “Fraga das Saímas” (Sábado, 21 de xaneiro de 2012), e atendendo ao artigo 10 dos estatutos da Asociación, está interesada en presentar candidatura ás eleccións da Xunta Directiva.

Segundo.- Presenta ante a Xunta Directiva actual, en tempo e forma, a súa candidatura oficial á nova Xunta Directiva, estando composta polas seguintes socias e coa distribución de cargos que a continuación se describe:

CARGO Nº SOCIA NOME DNI SINATURA

PRESIDENTA

SECRETARIA

TESOUREIRA

VOGAL 1ª

VOGAL 2ª

En San Andrés de Boimente, _____de _____________ de 2012

FELICITACIÓN DAS FESTAS NAVIDEÑAS

2011-12-29T04:41:00.001-08:00

IV EDICIÓN DO FESTIVAL DE NADAL "FRAGA DAS SAÍMAS-2011"

2011-12-21T10:59:00.000-08:00

O CONCERTO DE NADAL “FRAGA DAS SAÍMAS” A CARGO DO GRUPO MARIÑANO “CÁNERE SON” PUXO O BROCHE DE OURO ÁS ACTIVIDADES DESENVOLTAS NO ANO 2011 POLO COLECTIVO DE MULLERES DE SAN ANDRÉS.

O sábado 17 de decembro a Asociación de mulleres rurais “Fraga das Saímas” puxo como broche de ouro á súa programación anual-2011 e ao traballo da actual directiva ao longo dos último 4 anos, a celebración do seu IV Festival de Nadal-2011.

Esta 4ª edición do Festival de Nadal-2011, que deu comezo ás 18:30 horas no Centro Socio-Cultural, tivo como acto principal a celebración do 3º Concerto de Nadal “Fraga das Saímas” a cargo do grupo mariñano Cánere Son, cuxos integrantes cinco voces con ampla experirencia en corales e a música de virtuoso guitarrista Felipe Sánchez fixeron as delicias do público, que abarrotou o salón de actos.

Os integrantes de Cánere Son interpretaron temas latinoamericanos de comezos do século XX, como: o son, a guajira, boleros, e salsa cubana, entre outros. Un concerto de nadal que destacou principalmente por unha interpretación cálida e cargada de sentimento e paixón e que o público asistente agradeceu con numerosas mostras de entusiasmo e aplausos no transcurso deste concerto, “..único e especial en homenaxe a todas as nosas socias e veciños que apoiaron incondicionalmente esta asociación e que participaron con entusiasmo e ilusión en todos os proxectos e actividades desenvoltas polo colectivo Fraga das Saímas desde o seu nacemento, aló polo mes de febreiro do ano 2007..”, según palabras da propia presidenta, Flor Chao, durante o discurso de Benvida.

Logo de concluído este excepcional concerto, as máis de cen persoas que decidiron compartir e festexar o peche e o comezo dun aninovo coa Asociación de MMRR puideron degustar unha cea de confraternidade que comezou pasadas as 20.00 h. e na cal se ofreceu un catering servido polo Mesón O Imperial.

Durante a cea a Presidenta da Asociación “Fraga das Saímas”, Flor Chao, aproveitou para felicitar as festas de Nadal e expresar os mellores desexos para o 2011 a todas as súas socias e á comunidade veciñal. Durante a súa intervención tamén expresou a especial satisfacción e orgullo da súa directiva por todas as mulleres que se foron integrando na asociación “Fraga das Saímas”, nos últimos anos. Socias que xa forman parte da historia desta entidade e desta parroquia. Socias que sem elas o éxito deste colectivo non houbera sido posible. Socias que, en definitiva, son o corazón que manteñen viva esta asociación, concluíu a Presidenta.

Cos postres tamén chegou a música do acordeón e gaita do Home Orquestra (Hortensio) que arrancou numerosas ovacións do público e logrou que os comensales cantaran ao son da súa música. Logo desta primeira actuación de Hortensio, a directiva procedeu a efectuar o sorteo de tres espléndidas cestas navideñas e cinco cestiñas con outras tantas sorpresas. A sorte foi parar a mans de Lola, Mª Carmen, Eva, Adelina, Tonecho, Beatriz, Mónica e Olga. Tampouco este ano se quedaron sen agasallos as nenas e nenos que acudiron a esta festa navideña.

As portas do Centro Socio-Cultural de San Andrés de Boimente pecháronse pasadas as 2.00 h. da madrugada. Momento ata o cal as socias, familiares e convidados máis animosos bailaron e cantaron coa música de Hortensio, O Home Orquestra.

FESTIVAL DE NADAL "FRAGA DAS SAÍMAS"-2011

2011-11-29T13:33:00.000-08:00

A DIRECTIVA INFORMA AS SÚAS SOCIAS

A directiva do colectivo Fraga das Saímas pon en coñecemento de todas as súas socias e amigas...e seguidores forofos, a celebración do Festival de Nadal "Fraga das Saímas" 2011 no marco do cal terá lugar, entre outros, o CONCERTO DE NADAL "FRAGA DAS SAÍMAS-2011" a cargo do excepcional grupo viveirense CÁNERE SON e rematará a noite cun baile amenizado coa música de Hortensio o "Home Orquestra".

Con este Festival a Directiva da Fraga das Saímas (2008-2011) pon fin ao programa de actuacións 2011 e a súa labor desenvolta durante os últimos catro anos.

Esperamos que este ciclo no que as cinco membros da xunta directiva (Flor, Gloria, Xuxa, Adelina e Natalia) estivemos fronte ao colectivo de mulleres "Fraga das Saímas" servira para contribuír a facer un "pouquiño" máis agradable a vida das nosas socias, amigas e veciños de San Andrés de Boimente.

Desexamos poder ver a todas as nosas socias incondicionais e tamén, como non, ás máis remolonas o vindeiro Sábado 17 de decembro para poder darvos as grazas persoalmente por apoiarnos e facilitarnos a nosa tarefa como Directiva da asociación.

CON POUCO PODEMOS FACER MOITO PERO UNIDAS PODEMOS FACELO TODO!

ÚNETE A ESTA FESTA ÚNICA E ACUDE AO CENTRO SOCIO-CULTURAL DE SANTO ANDRÉ DE BOIMENTE O SÁBADO 17 A PARTIR DAS 18.30H.

MULLERES VÍTIMAS DA VIOLENCIA MACHISTA RECORDADAS POLO COLECTIVO "FRAGA DAS SAÍMAS"

2011-11-27T11:35:00.000-08:00

AS MULLERES DO COLECTIVO FRAGA DAS SAÍMAS RECORDAN ÁS CINCOENTA E OITO COMPAÑEIRAS ASASINADAS NO ANO 2011 EN ESPAÑA, VÍTIMAS DA VIOLENCIA MACHISTA.

Na tarde do xoves, 24 de novembro, socias do colectivo “Fraga das Saímas”, con motivo da celebración do Día Internacional contra a violencia machista, recordaron nun acto conmemorativo ás 58 mulleres asasinadas no estado español no ano 2011, da man dos seus compañeiros e verdugos.

O acto deu comezo ás 18.00 horas, diante do Centro Socio-Cultural de San Andrés de Boimente, coa lectura da presidenta, Flor Chao, dun manifesto de apoio ás familias das compañeiras vítimas da violencia machista e de reivindicación a todos os grupos políticos e administracións públicas para pedir unha maior implicación e a adopción de medidas reais e contundentes para erradicar esta vergoñenta lacra social. Durante a súa intervención a Presidenta deste colectivo manifestou que por moito que neste país se lexisle a prol da igualdade e os dereitos da muller non avanzaremos nada mentras se sigan facendo declaracións públicas “sexistas e irrespetuosas” por parte dalgún que outro cargo político e mentras siga habendo sentencias xudiciais machistas e ofensivas para as mulleres maltratadas”. Declaracións e sentencias que a todas se nos veñen á cabeza e que ao recordalas nos fan indignarnos aínda máis. A presidenta rematou a lectura do manifesto animando a todos os cidadáns a educar en igualdade e a actuar con valentía, denunciando calquera tipo de maltrato para “romper co círculo da morte”.

Ao rematar a lectura do manifesto e co obxecto de contribuír a preservar a memoria das mulleres asasinadas as presentes neste acto recordaron en voz alta, unha a unha ás 58 compañeiras asasinadas no estado español no ano 2011 como consecuencia da violencia machista, mentras acendían velas e as colocaban sobre un lazo violeta.

O manifesto do 25 N, xunto coa listaxe dos nomes das 58 compañeiras asasinadas, foi colocado na porta principal do Centro Socio-Cultural co fin de permacer exposto ao público durante unha semana.

GRITA CON NÓS: BASTA XA!

2011-11-25T00:01:00.000-08:00

MANIFESTO DO 25 DE NOVEMBRO:
DÍA INTERNACIONAL CONTRA A VIOLENCIA MACHISTA

Con motivo da celebración do Día Internacional contra a violencia machista o noso colectivo quere sumarse a todas aquelas institucións, asociacións e plataformas que están a traballar a prol dos dereitos das mulleres, na defensa e reivindicación contra os malos tratos de milleiros de mulleres que están a sufrir día a día degradacións e vexacións que en demasiadas ocasións acaban segando a vida destas compañeiras.

Queremos trasladarlles a nosa forza e todo o noso alento ás familias que a violencia machista segou a vida das súas fillas, das súas nais, das súas irmás...das súas heroínas no silencio.

Reivindicamos e esiximos de todos os grupos políticos e administracións públicas maior implicación e a adopción de medidas reais e contundentes para erradicar esta vergoñenta lacra social e animamos a todas as cidadás e cidadáns a educar en igualdade e actuar con valentía, denunciando calquera tipo de maltrato para ROMPER CO CÍRCULO DA MORTE.

Queremos contribuír a preservar a memoria das vítimas da violencia machista recordando en voz alta a todas e cada unha das 58 mulleres asasinadas no ano 2011 no estado español:

DATA	NOME	PROVINCIA
12 xaneiro	Ana María (49 anos)	Segovia
13 xaneiro	W.L. (de 29 anos)	Granada
17 xaneiro	Carmen (54 anos)	Madrid
26 xaneiro	Jennifer (37 anos)	Murcia
28 xaneiro	Compañeira asesinada en Calviá	Mallorca
28 xaneiro	Compañeira asesinada en Fuerteventura	Canarias
30 xaneiro	Ramona (44 anos)	Jaén
30 xaneiro	J.M.M de 43 anos	Ciudad Real
3 febreiro	C.C.T de 46 anos	Almería
11 febreiro	Compañeira asesinada en Barcelona	Barcelona
15 febreiro	Compañeira asesinada en Málaga	Málaga
18 febreiro	Compañeira de Girona asesinada en Alemania	Girona
23 febreiro	Compañeira de 32 asesinada en Valencia	Valencia
23 febreiro	Compañeira asesinada en Reus – Tarragona	Tarragona
7 marzo	Compañeira asesinada en Fuente el Saz del Jarama	Madrid
21 marzo	N.C.C de 62 anos	Granada
22 marzo	Compañeira de 44 anos asesinada en Torredelcampo	Jaén
4 de abril	Yanela	Navarra
5 abril	Rapaza de 20 anos (embarazada)	Madrid
12 abril	Compañeira asesinada en Mutxamel	Alicante
24 abril	Compañeira asesinada en Santa Coloma de Gramanet	Barcelona
30 abril	Carmen	Barcelona
6 maio	Cándida (71 anos)	Girona
8 maio	A.E.N (30 anos)	Almería
8 maio	Marisol Consuelo (40 anos)	Madrid
14 maio	Compañeira asesinada en Noia	Coruña
15 maio	Compañeira de 29 anos asesinada en Córdoba	Córdoba
15 maio	Rosa María (39 anos)	Barcelona
30 maio	Compañeira asesinada en Fines	Almería
´1 xuño	Inés (64 anos)	Asturias
1 xuño	Miren asesinada en Móstoles	Madrid
1 xuño	Teresa (82 anos)	Valencia
11 xuño	Compañeira asesinada en La Ametlla de Mar	Tarragona
13 xuño	Compañeira asesinada en Sant Andreu	Barcelona
16 xuño	Compañeira de 31 anos asesinada en Durango	Bizkaia
3 xullo	Rosario	Guipuzkoa
3 xullo	Compañeira asesinada en Zaragoza	Zaragoza
4 xullo	Compañeira asesinada en Barcelona	Barcelona
16 xullo	Julia (30 anos)	Valencia
19 xullo	Mónica (19 anos)	Granada
3 agosto	Fructuosa (70 anos)	Madrid
6 agosto	Giovanna (38 anos)	Madrid
22 agosto	Deisy asesinada en Bilbao	Bizkaia
25 agosto	Caridad (75 anos)	Murcia
29 agosto	Compañeira de 49 anos asesinada en Burgos	Burgos
18 agosto	L.M.G (40 anos)	Sevilla
18 agosto	Clementina	Tenerife
18 agosto	Ester (47 anos)	Castellón
22 agosto	Compañeira asesinada en Puzol	Valencia
27 agosto	Compañeira de 41 anos asesinada en Vicar	Almería
27 agosto	F.L. (71 anos)	Cádiz
9 outubro	Compañeira de 78 anos asesinada en Calpe	Alicante
11 outubro	Compañeira de 39 anos asesinada en Vigo	Coruña
12 outubro	Mara (37 anos)	Canarias
14 outubro	Compañeira de 29 anos asesinada en Avilés	Asturias
17 outubro	Compañeira de 38 anos asesinada en Girona	Girona
24 outubro	Nuria Orol (24 anos)	Mallorca
2 novembro	Tatiana (29 anos)	Zaragoza

O MAGOSTO ORGANIZADO POLO COLECTIVO "FRAGA DAS SAÍMAS": O PRINCIPAL PROTAGONISTA DESTA FIN DE SEMANA EN SANTO ANDRÉ DE BOIMENTE

2011-11-14T01:43:00.000-08:00

As actuacións de “ Caxoto Contacontos” e do Dúo musical “Aguamarina” amenizaron a 4ª edición do Magosto “Fraga das Saímas”: Toma Castañas!

O MAGOSTO “FRAGA DAS SAÍMAS” REÚNE NA SÚA CUARTA EDICIÓN A UN CENTO DE PERSOAS NO CENTRO SOCIO-CULTURAL DE SAN ANDRÉS DE BOIMENTE.

A tarde-noite deste sábado 12 de novembro o Centro Socio-Cultural de San Andrés de Boimente acolleu a 4ª edición do Magosto: Toma Castañas! organizada polo colectivo de mulleres “Fraga das Saímas”, superando todas as previsións das organizadoras.

Esta celebración deu comezo ás 18.30 coa intervención da Presidenta, Flor Chao, que aproveitou para dar a benvida, nun salón ateigado de público, ás socias, veciños e convidados, agradecéndolles a súa presenza e a súa participación, xunto á asociación Fraga das Saímas, no “..homenaxe á filla do castiñeiro e disfrutar dunha das festas máis antigas e populares celebradas polos nosos ancestros desde tempos inmemoriables...”

Durante a benvida, Flor Chao recordou que, aínda que a castaña xa non era a base da alimentación da poboación, nin nos menús da alta cociña nin nas mesas máis humildes se olvidaran da Señora castaña. E como mostra diso, a Directiva quixo facer unha pequena selección de exquisitas receitas de cociña elaboradas a base de castañas que segundo palabras da presidenta eran para “..agasallar a todas as namoradas e namorados da cociña que estean interesadas en descubrir as múltiples posibilidades culinarias deste produto milenario...”

Logo da presentación da máxima representante da entidade organizadora, nenos e maiores fixeron unha viaxe imaxinaria da man do contador de historias Caxoto Contacontos que os arrastrou ao longo de máis dunha hora de actuación a un mundo de misterios, sustos e risas.

Rematada esta actuación, onde o público recibiu algún que outro “susto” e sufriron algún que outro ataque de risa, a Directiva repartiu máis de cincoenta libretos de receitas de castañas e convidou ao centenar de asistentes a dar boa conta dun magosto popular a base de castañas asadas, chourizos e lacón. Todo isto regado cun viño da terra, refrescos,café e postre.

Este ritual popular prolongouse ata pasadas a 1.00 h. da madrugada, onde os máis festeiros puideron bailar ao ritmo do dúo viveirense Aguamarina, cuxos compoñentes fixeron as delicias de todo o público.

E para concluír dicir que a Directiva “Fraga das Saímas” está moi satisfeita pola gran acollida que tivo esta edición do Magosto e empraza a todos os seus veciños e as súas socias de San Andrés, Chavín, San Pedro, Landrove, Xunqueira, Covas, Vieiro e Viveiro para o Sábado, 17 de decembro a partir das 18.30 h. Día que terá lugar a celebración do Festival de Nadal “Fraga das Saímas-2011”

LOTARÍA DE NADAL-2011

2011-10-05T15:13:00.000-07:00

APREZADA SOCIA: ESTÁS PREPARADA PARA GAÑAR? AGORA É A TÚA OCASIÓN. NON DEIXES PASAR ESTA OPORTUNIDADE!

IV EDICIÓN DO MAGOSTO "FRAGA DAS SAÍMAS":TOMA CASTAÑAS!

2011-10-05T14:53:00.000-07:00

QUERES VIR A PASAR UN RATO AGRADABLE

E DIVERTIDO CON NÓS?

APÚNTATE XA!

CASETAS NOVAS PARA A PARROQUIA DE SANTO ANDRÉ DE BOIMENTE

2011-10-04T14:15:00.000-07:00

AS VECIÑAS E VECIÑOS DE SANTO ANDRÉ DE BOIMENTE VEÑEN DE ESTREAR RECENTEMENTE AS NOVAS CASETAS.

Logo de que no mes de maio foran retiradas, polo concello de Viveiro, as dúas vellas e deterioradas marquesinas existentes na parroquia de Santo André de Boimente para sustituílas por dúas novas a través do Plan provincial de marquesinas da Deputación de Lugo, as veciñas e veciños desta parroquia están de noraboa trala instalación, polos servizos municipais do Concello de Viveiro, das novas casetas á beira da estrada LU-161, ao seu paso polos barrios de Abuín e Boimente.

No mes de agosto a AMRR "Fraga das Saímas" presentara no Concello de Viveiro un escrito na que demandaba ao goberno municipal, entre outros equipamentos e servizos, axilizar a reposición destas casetas.

Como veciños responsables que somos todas e todos, a Asociación "Fraga das Saímas" convida a toda a comunidade veciñal a facer bo uso deste equipamento colectivo e de todos e propón que a partir de agora intentemos cuidalo e conservalo nas melloras condicións posibles, evitando entre outras cousas pegar carteis nelas.

Igual que no seu día demandamos oficial e publicamente ao concello unha serie de servizos básicos para a nosa comunidade, moitos dos cales aínda continuamos sen eles, tamén agora queremos mostrar publicamente a nosa satisfación pola colocación destas casetas e o recoñecemento ao concello de Viveiro e a Deputación provincial de Lugo por "un traballo" ben feito.

Esperamos asimesmo que as restantes reinvidicacións feitas, polo colectivo Fraga das Saímas, e tan necesarias para a parroquia (restauración das fontes veciñais, conexión a internet vía Wimax, mantemento de pistas, aglomerado do aparcadoiro do Centro Socio-Cultural...) non as deixe caer o goberno municipal en saco roto.

PRESENTACIÓN DO LIBRO-CATÁLOGO "O ESPELLO DAS LEMBRANZAS"

2011-10-03T09:07:00.000-07:00

ANTÓN VEIGA, VICEPRESIDENTE DA DEPUTACIÓN PROVINCIAL DE LUGO, XUNTO A UN CENTENAR DE VECIÑAS/OS E CONVIDADOS, ASISTÍU Á PRESENTACIÓN DO LIBRO-CATÁLOGO "O ESPELLO DAS LEMBRANZAS" EDITADO POLO COLECTIVO "FRAGA DAS SAÍMAS"

O Centro Socio-Cultural de San Andrés de Boimente acolleu esta fin de semana o ACTO DE PRESENTACIÓN DO LIBRO-CATÁLOGO "O ESPELLO DAS LEMBRANZAS" editado pola Asociación de mulleres rurais "Fraga das Saímas" e cuxa organización correu a cargo da Directiva do propio Colectivo.

Este acto comezou ás 18.30 horas coa Benvida da Secretaria da Asociación, nun salón de actos abarrotado de veciños, de socias do colectivo Fraga das Saímas, de amigos convidados e inclusive, para sorpresa das membros da organización, dalgún que outro espontáneo que decidiu pola súa conta sumarse a este acto.

Entre as autoridades que foron convidadas e que asistiron a este acto atopábase o Sr. Vicepresidente Primeiro da Deputación Provincial de Lugo, Antón Veiga e a Sra. Concelleira de Cultura e Turismo do Concello de Viveiro, Olaia Casas. Por outro lado a Sra. Concelleira de Servizos Sociais do Concello de Viveiro, Isabel Rodríguez disculpou a súa asistencia debido a motivos de axenda.

A Presentación do libro "O espello das Lembranzas" estivo a cargo de Flor Chao, presidenta e alma máter do colectivo "Fraga das Saímas", que aproveitou a súa intervención para agradecer publicamente o apoio da Área de Cultura da Deputación de Lugo, o esforzo dos veciños da parroquia e a colaboración das súas socias. Durante o seu discurso, Flor resaltou que "..as historias da xente corrente como son as protagonistas do catálogo O Espello das Lembranzas forman parte dos milleiros de espellos que reflexan a verdadeira historia do noso país. Un país de xente loitadora, traballadora e por riba das calamidades e das dificultades dunha dura realidade coa que se viron obrigados a convivir día tras día, sempre valentes e optimistas..." . Asimesmo e durante outro momento da presentación deste primeiro e único libro que recupera a memoria e a historia das veciñas e veciños da parroquia de San Andrés, a Presidenta explicou que ás fotografías, fragmentos conmovedores do noso pasado e da nosa propia historia, acompáñanas uns textos ilustrativos do que foi a vida durante esas décadas nesta parroquia. Pero ademais non queríamos deixar pasar a oportunidade que este volume nos brindaba de recoller, aínda que só fose superficialmente, xunto coas imaxes e os seus comentarios pertinentes, todo o que existira con forza e entidade propia: ritos agrogandeiros, costumes, lecer, hábitos, a forma de falar, etc...toda unha cultura que foi antano a razón da idiosincrasia desta comunidade durante moitos lustros.

O acto foi clausurado polo Sr. Vicepresidente da Deputación provincial de Lugo, o Sr. Veiga, que alabou o traballo socio-cultural que estaba a realizar o colectivo "Fraga das Saímas" e animou as súas socias a poñer en marcha proxectos coma o recén finalizado O Espello das Lembranzas.

Rematada a presentación deste libro-catálogo, os asistentes gozaron coa música e as cancións de Mini e Mero e os máis animados cantaron cos fundadores e compoñentes do grupo Quenlla, dúas das figuras máis relevantes no campo da investigación da música tradicional galega.

Logo de finalizado o recital musical, todos os asistentes foron convidados á degustación duns petiscos e dun viño galego.

O acto finalizou pasadas as 21.00 h. logo de que a Directiva repartira entre os veciños de San Andrés asistentes a esta presentación, máis de 70 exemplares.

Durante as vindeiras semanas todas as socias, as veciñas e veciños da parroquia de San Andrés, residentes e non residentes na parroquia e persoas con lazos familiares en San Andrés poderán solicitar un exemplar á Directiva en tanto o número de exemplares non se esgote.

Esperamos que este proxecto fora do interese e agrado de todas e todos, fundamentalmente das nosas socias e veciños de San Andrés de Boimente.

OFERTA PÚBLICA DAS ACTIVIDADES FORMATIVAS "FRAGA DAS SAÍMAS-2011/2012"

2011-09-27T11:16:00.000-07:00

AS ACTIVIDADES SOCIO-FORMATIVAS OFERTADAS POLO COLECTIVO “FRAGA DAS SAÍMAS” PARA A TEMPADA 2011-2012 BUSCAN POTENCIAR OS HÁBITOS É APTITUDES SAUDABLES ENTRE AS PERSOAS MAIORES.

A Directiva da AMMRR “Fraga das Saímas” acaba de abrir o prazo para inscribirse nas diferentes actividades formativas programadas por este colectivo para a tempada 2011-2012 (outubro-xuño)

Entre as actividades formativas que se están a por en marcha pola Directiva da Fraga das Saímas a partires do mes de outubro e que se desenvolverán no Centro socio-cultural de San Andrés de Boimente cabe destacar os seguintes cursos:

- Curso de Xerontoximnasia.- Entre os obxectivos principais que pretende lograr a Directa coa organización deste curso están, entre outros, potenciar hábitos e actitudes saudables do mundo da ximnasia na terceira idade é conseguir unha actitude positiva entre as súas sócias e veciños para ver as cousas dun xeito máis optimista ante os problemas e limitacións asociadas á terceira idade, e ao mesmo tempo intentar mellorar a forma física daquelas sócias e veciños que presentan algún tipo de deterioro físico ou problemas locomotores.

Para alcanzar estes obxectivos a responsable do curso utilizará técnicas como a ximnasia inicial, a ximnasia ao aire libre, paseos e piscina.

- Obradoiro de entrenamento da memoria para maiores.- Con este taller o colectivo de mulleres Fraga das Saímas, intenta incidir no mantemento e na mellora da memoria daquelas persoas que sofren unha perda progresiva da memoria e consecuentemente unha falta de autonomía persoal e inseguridade na súa vida cotiá.

O curso impartirase todos os martes de 19.00 ás 20.00 h. pola Técnica Lorena Díaz e comezará o vindeiro 4 de outubro.

Tamén comezará a primeira semana do mes de outubro o Taller de Manualidades que será impartido pola monitora Pilar Álvarez todos os xoves en horario de 16:00 a 19:00 horas. Neste taller as socias inscritas poderán aprender e perfeccionar as diferentes técnicas de pintura (acuarela, esmalte e óleo), restauración, bordado, calceta, ganchillo e encaixe de bolillos, entre outros.

Por outra banda, a Directiva lamenta comunicar ás persoas interesadas nos cursos de internet que continuamos sen poder impartilos posto que logo de ano e medio sen conexión á Rede de Telecentros (abril 2009) seguimos a espera que o Concello de Viveiro conecte o Centro Socio-Cultural parroquial, vía wifi/wimax, a internet e ao resto de Telecentros.

As persoas que estean interesadas nalgún destes cursos e desexen compartir coas mulleres do colectivo “Fraga das Saímas” un espazo de ocio e un tempo para elas poderán inscribirse chamando ao teléfono 669250948.

UNHA HOMENAXE AOS VECIÑOS DE SANTO ANDRÉ DE BOIMENTE

2011-09-06T14:02:00.000-07:00

Queridas socias, veciños de Santo André de Boimente e todas as nosas seguidoras e seguidores,

A Directiva da asociación mulleres Rurais Fraga das Saímas

SAÚDAVOS

e ten o pracer de convidarvos á presentación do libro-catálogo "O ESPELLO DAS LEMBRANZAS" editado pola nosa asociación.

Como ben sabedes este libro forma parte dun proxecto posto en marcha pola nosa asociación no ano 2010 ao obxecto de preservar e poñer en valor o patrimonio máis prezado da nosa parroquia: a historia das veciñas e veciños de Santo André de Boimente.

A presentación oficial terá lugar o sábado 1 de outubro de 2011 ás 18:00 horas no Centro Socio-Cultural de San Andrés de Boimente.

A continuación as persoas asistentes poderán gozar coa actuación musical dos fundadores dos grupos musicais Fuxan os Ventos e Quenlla (Mini e Mero). Logo deste concerto ofrecerase un viño galego acompañado duns pinchos.

As socias e veciños que desexen asistir a este acto único e irrepetible deberán confirmar a súa asistencia en calquera dos teléfonos: 669250948 (Flor) ou 610007746 (Gloria) ANTES DO 25 DE SETEMBRO.

Contamos coa vosa presenza!

"FRAGA DAS SAÍMAS" RECLAMA AO CONCELLO DE VIVEIRO SERVIZOS BÁSICOS PARA A PARROQUIA DE SAN ANDRÉS DE BOIMENTE

2011-08-31T13:32:00.000-07:00

"Fraga das Saímas" espera do concello de Viveiro unha xestión áxil que atenda as necesidades e carencias na prestación de servizos básicos que veñen sufrindo as veciñas e veciños da parroquia de San Andrés de Boimente.

O COLECTIVO DE MULLERES “FRAGA DAS SAÍMAS” DEMANDA AO CONCELLO DE VIVEIRO A PRESTACIÓN DE SERVIZOS PÚBLICOS MUNICIPAIS BÁSICOS PARA A MELLORA DAS CONDICIÓNS DE VIDA DAS VECIÑAS E VECIÑOS DE SAN ANDRÉS DE BOIMENTE

A asociación de Mulleres Rurais "Fraga das Saímas" trasladoulle, a comezos do mês de agosto, ao concello de Viveiro algunha das necesidades da súa parroquia e as carencias na prestación de servizos básicos que están a sufrir as súas veciñas e veciños de Santo André de Boimente

O colectivo “Fraga das Saímas”, a través dun escrito presentado pola súa Presidenta, reclama do Concello de Viveiro a prestación dalgúns servizos públicos municipais básicos e dotación de equipamentos “mínimos”, demandados en diferentes ocasións pola comunidade veciñal da parroquia de San Andrés de Boimente. Entre algunha das demandas que recolle o escrito cabe destacar as seguintes:

- Rehabilitación das fontes públicas de Boimente, Morgade, Abuín e a Igrexa.

- Reposición das casetas vellas retiradas no mes de maio e pendentes de instalar as novas a día de hoxe.

- Dotar de conexión a internet (vía Wifi/Wimax) o Centro Socio-Cultural da parroquia. Esta conexión, que está pendente desde hai máis dun ano, é a única “porta dixital” coa que contaría a comunidade veciñal.

- Mantemento de pistas e aglomerado do aparcadoiro do Centro Socio-Cultural da parroquia. Obra esta última pendente, logo de facerse cargo a asociación de mulleres dos traballos de acondicionamento deste aparcadoiro e anexo.

- Dotación dun contedor de vidro e outro de papel e tres expositores publicitários.

A entidade entende que a pesares de ser unha parroquia que conta cun número de habitantes reducido, debido á perda de poboación no rural pola falla de oportunidades así como pola carencia de servizos básicos, e onde ademais a maioría das veciñas/os superan os 65 anos, o concello ten a obriga legal e moral de atender as súas necesidades coa mesma premura e efectividade coa que resolve as do resto da cidadanía viveirense.

Desde o colectivo “Fraga das Saímas” están convencidas de que os servizos “mínimos” demandados e dos que carece a súa parroquia se lles atopará unha solución a curto prazo e con baixo custo económico para o concello e os seus veciños, posto que cren que o concello de Viveiro e o seu goberno municipal terán a vontade e a capacidade de traballo necesarias para xestionar os servizos públicos municipais e poñelos a disposición de toda a súa comunidade veciñal.

VISITA Á RESIDENCIA DE MAIORES (GERIATROS-VIVEIRO)

2011-08-08T00:47:00.000-07:00

Unha vintena de mulleres do colectivo “Fraga das Saímas” comparten o primeiro fin de semana de agosto cos Maiores da Residencia Geriatros-Viveiro con motivo da clausura da Exposición fotográfica “Fraga das Saímas, Monumento Natural”.

A Directiva da entidade “Fraga das Saímas” acompañadas por vintecinco socias e familiares desprazáronse o sábado 6 de agosto ata a Residencia de Maiores Geriatros-Viveiro para participar no acto de clausura da exposición fotográfica “Fraga das Saímas, Monumento Natural”, que permaneceu neste Centro residencial, á iniciativa do colectivo de mulleres de Santo André de Boimente, desde o pasado mes de xullo.

O colectivo de mulleres da asociación “Fraga das Saímas foi recibido, pasadas as 4 da tarde, pola animadora socio-cultural Virginia Mariño, que aproveitou para darlles a benvida en nome da Dirección de Geriatros e convidalas a coñecer as instalacións da Residencia viveirense, mentras lles explicaba as características do Centro e o seu funcionamento (servizos dos que dispón, persoal contratado, actividades que se están a desenvolver, etc...).

Durante o acto de clausura da exposición fotográfica as membros colectivo de mulleres “Fraga das Saímas” e os seus acompañantes tiveron ocasión de compartir xogos de mesa, conversa e merenda cos residentes de Geriatros-Viveiro.

A visita da comitiva da asociación “Fraga das Saímas” e a clausura da súa exposición fotográfica rematou pasadas as 19.30 horas, momento en que a Directiva aproveitou para agradecerlle ao persoal do Centro residencial a boa acollida ao colectivo da entidade e á súa iniciativa fotográfica. Antes de despedirse a Asociación de mulleres comprometeuse a seguir colaborando co persoal da Residencia viveirense en futuros proxectos socio-culturais.

DÍA DA SOCIA "FRAGA DAS SAÍMAS" - 2011

2011-08-01T13:57:00.000-07:00

O Candaoso foi un ano máis o lugar escollido polas mulleres da Asociación “Fraga das Saímas” para celebrar o Día da Socia-2011 e gozar coa beleza das súas paraxe naturais.

ÉXITO DE PARTICIPACIÓN NA 3ª EDICIÓN DA SARDIÑADA DO CANDAOSO ORGANIZADA POLA ASOCIACIÓN “FRAGA DAS SAÍMAS” CON MOTIVO DA CELEBRACIÓN DO DÍA DA SOCIA-2011.

A Directiva da Asociación Fraga das Saímas ven de organizar esta última fin de semana de xullo a 3ª edición da Sardiñada do Candaoso con motivo da celebración do Día da Socia-2011.

As socias da Asociación Fraga das Saímas elixiron un ano máis a explanada do curro do Candaoso (sito nos montes do Buio e moi próxima á Fraga das Saímas) como o lugar máis idóneo para disfrutar dunha xornada de convivencia cos seus familiares e convidados. Os asistentes aproveitaron para pasear por estas paraxes naturais e gozar das vistas máis sorprendentes coas que os montes do Buio ten acostumados a todo aquel que decide achegarse ata el un día soleado como a tarde do sábado 30.

A xornada festiva deu comezo a mediodía, onde as membros da Directiva e voluntarios prepararon unha sardiñada con cachelos, acompañada de lacón asado, empanadas e chourizos, para máis de oitenta socias, familiares e convidados asistentes á celebración do Día da Socia da Fraga das Saímas.

Durante esta xornada de convivencia os asistentes, amantes do baile, tamén tiveron a ocasión para practicar o seu hobby favorito ao ritmo da música do viveirense César O´Píndaro. Pasadas as 19.30 h. da tarde os convidados comezaron a retirarse, sendo despedidos pola Directiva da asociación “Fraga das Saímas” que aproveitou para agradecerlles a súa participación na xornada festiva e emplazou a todos para o Día da Socia-2012.

A EXPOSICIÓN "FRAGA DAS SAÍMAS, MONUMENTO NATURAL" CONTINUA A SÚA ANDAINA POLA CIDADE DO LANDRO

2011-07-18T08:32:00.000-07:00

A Exposición Fotográfica “Fraga das Saímas, Monumento Natural”: un proxecto socio-educativo e Medioambiental que a Directiva da AMMRR Fraga das Saímas puxo tamén a disposición do colectivo de maiores da Residencia Geriatros de Viveiro para o seu disfrute ata mediados do mes de agosto.

A EXPOSICIÓN FOTOGRÁFICA "FRAGA DAS SAÍMAS, MONUMENTO NATURAL" TRASLÁDASE Á RESIDENCIA GERIATROS DE VIVEIRO DURANTE UN MES.

A pasada semana membros da Directiva da AMMRR "Fraga das Saímas" trasladaron a Exposición fotográfica: Fraga das Saímas, Monumento Natural á Residencia de maiores xestionada por Geriatros, sita a pé da praia de Covas.

Esta exposición itinerante comezou a súa andaina o 30 de abril deste ano, no Centro Socio-Cultural de Santo André de Boimente, lugar onde foi inaugurada e no cal estivo durante un mes e medio. A colaboración e a boa vontade do persoal do Centro Comarcal da Mariña Occidental fixo posible que se trasladara á súa sá de exposicións e que fora visitada por máis de 200 persoas en apenas durante 15 días.

Coa montaxe da exposición fotográfica “Fraga das Saímas, Monumento Natural, na Residencia de Geriatros, a Directiva do colectivo de mulleres da parroquia de Santo André de Boimente quixo, coa súa proposta contribuír e participar na integración, do colectivo de maiores residentes neste Centro, na comunidade veciñal viveirense, así como de xeito paralelo divulgar e fomentar o Patrimonio Natural da súa parroquia.

A boa acollida desta iniciativa por parte da Dirección de Geriatros-Viveiro fai posible que todas as persoas residentes no seu Centro teñan a oportunidade de “visitar a Fraga das Saímas” a través das fotografías que compoñen esta exposición na que se reflicte a beleza salvaxe desta contorna natural.

Esta exposición, que permanecerá ata mediados de agosto, poderá ser visitada tamén polos familiares dos residentes e veciñas/os de Viveiro que se queiran achegar ata a Residência de Maiores.

DÍA DA SOCIA "FRAGA DAS SAÍMAS"-2011

2011-07-12T07:36:00.000-07:00

A DIRECTIVA DA AMMRR "FRAGA DAS SAÍMAS" ABRÍU O PRAZO PARA PARTICIPAR NA CELEBRACIÓN DO DÍA DAS SOCIAS-2011.

A Directiva comunica a todas as súas socias, simpatizantes e seguidoras/es que o sábado 30 de xullo a asociación Fraga das Saímas celebra por terceiro ano consecutivo o Día das Socias. Esta celebración terá lugar como ven sendo costume na explanada dos montes do Buio e a festa comezará a partir das 14.00 horas, onde as membros da Directiva e voluntarias/os preparán unha sardiñada para os asistentes. Para amenizar esta celebración a asociación contará coa actuación do músico viveirense César, máis coñecido como "O Pindaro".

A esta celebración poderán acudir todas as socias, as súas parellas e fillos.

Se eres unha socia animosa, vital e participativa chámanos e apúntate XA! e se pensas que a vida merece a pena disfrutala con alegría e bo humor ten por seguro que o sábado 30 vai ser un deses días inolvidables! ESPERÁMOSTE!

EXPOSICIÓN FOTOGRÁFICA: "FRAGA DAS SAÍMAS, MONUMENTO NATURAL"

2011-06-26T13:51:00.000-07:00

Contribuír a garantir o respecto e a conservación dos ecosistemas naturais, a través de proxectos socio-educativos como é nesta ocasión a Exposición Fotográfica sobre a Fraga das Saímas, é un dos obxectivos que sempre teñen presente desde a Asociación de mulleres Rurais da parroquia de Santo André de Boimente.

O CENTRO COMARCAL DA MARIÑA OCCIDENTAL ACOLLE A EXPOSICIÓN FOTOGRÁFICA "FRAGA DAS SAÍMAS, MONUMENTO NATURAL" DURANTE 15 DÍAS.

Esta fin de semana membros da Directiva da AMMRR "Fraga das Saímas" trasladaron a Exposición fotográfica: Fraga das Saímas, Monumento Natural ao Centro Comarcal da Mariña Occidental, sita na Rúa Ramón Canosa (ao lado do Centro de Saúde de Viveiro). Esta exposición itinerante ven de estar no Centro Socio-Cultural de Santo André de Boimente desde o 30 de abril, data na que fora inaugurada, coincidindo coa IV Festa do Medio Natural e Familia e a Gala de entrega dos Premios do Concurso de fotografía sobre a Fraga das Saímas.

A exposición compóñena 30 fotografías seleccionadas entre as participantes do Iº Concurso de Fotografía sobre a Fraga das Saimas, un vídeo coa reprodución das 52 fotografías presentadas a este concurso e un catálogo da exposición que recolle as 30 fotografías expostas.

Esta exposición poderá ser visitada polo público desde o sábado 25 de xuño ata o sábado 9 de xullo de 2011, en horario de 10.00 h. a 14.00 h polas mañáns e de 18.00 h ás 20.00 h. polas tardes, de luns a venres. Os sábados poderase visitar de 12.00 h. ás 14.00 h.

As cincuenta primeiras persoas que visiten esta exposición terán a oportunidade de levarse como recordo un dos 50 catálogos da exposición deseñados para esta ocasión.

A Directiva anima a visitar esta exposición fotográfica a todas as persoas que non tiveron oportunidade de admirar esta pequena pero excepcional mostra dun dos nosos máis preciados patrimonios. Mostra coa que a Directiva deste colectivo de mulleres pretende fomentar o coñecemento e o gozo desta paraxe natural entre a poboación do concello e os visitantes que se achegan a este municipio, así como promover o respecto e o coidado do noso patrimonio natural, contribuíndo con isto a concienciar á cidadanía da necesidade de reclamar un cambio de xestión dos sistemas forestais para erradicar a degradación dos nosos montes e garantir a conservación dos ecosistemas naturais.

Por último, A Directiva quere expresar publicamente o seu agradecemento ao persoal do Centro Comarcal da Mariña Occidental (Ana e Melania) pola súa inestimábel colaboración e implicación neste proxecto desde o seu comezo, o cal non sería posible se elas non fixeran un excepcional traballo de información, divulgación e recepción dos traballos presentados ao Concurso fotográfico sobre a Fraga das Saímas e que deu como resultado final esta novidosa exposición-homenaxe ao noso Patrimonio Natural.

CLAUSURA DO PROGRAMA DE ACTIVIDADES FÍSICO-DEPORTIVAS 2010-2011

2011-06-24T04:13:00.000-07:00

A saúde física e psicosocial das mulleres da Asociación da “Fraga das Saímas”, un dos principais retos da Directiva da asociación de mulleres rurais de Santo André de Boimente.

O PROGRAMA DE ACTIVIDADES FÍSICO-DEPORTIVAS E DA ESTIMULACIÓN DA MEMORIA E DAS HABILIDADES MANUAIS DESENVOLTO POLA ASOCIACIÓN “FRAGA DAS SAÍMAS” CLAUSURA EXITOSAMENTE A SÚA CUARTA EDICIÓN.

A piscina municipal de Xove acolleu durante os últimos meses, nas súas instalacións, ás alumnas do módulo de actividades acuáticas, organizada pola asociación “Fraga das Saímas a través da súa monitora do curso de animación deportiva, Lorena Díaz, cuxas nadadoras “veteranas”· clausuran mañá venres o programa de actividades físico-deportiva, psicosocial e de manualidades 2010-2011 da asociación ·”Fraga das Saímas”.

Un dos retos que se persegue desde a Directiva, con este tipo de actividades físico-deportivas, de estimulación da memoria e das habilidades manuais é mellorar a saúde física e psicosocial das mulleres integradas no colectivo da Fraga das Saímas.

Os cursos organizados pola asociación “Fraga das Saímas” acolleron, no Centro Socio-Cultural de Santo André de Boimente, ao longo desta última edición a máis dunha veintena de alumnas que durante as tardes dos martes, xoves e venres dos últimos meses conseguiron coa práctica de actividade física (clases de natación, práctica do cachibol, clases de movementos corporais, clases de atención e estimulación da memoria) melloras a nivel articular e de movilidade, así como un aumento da acción muscular, entre outras, ao mesmo tempo que se conseguíu mellorar as oportunidades de socialización entre as socias de maior idade.

A Directiva da asociación expresa a súa satisfación pola boa acollida que tiveron todos os cursos desenvoltos na edición 2010-2011 e agradece as súas socias a colaboración e a implicación nestas actividades formativas e espera que na vindeira temporada o número de alumnas supere incluso á pasada por iso anima as súas socias e convida as veciñas de todo o concello a participar coa asociación Fraga das Saímas no seu proxecto socio-formativo.

Felices vacacións a todas as nosas alumnas! Vémonos en setembro.

CELEBRACIÓN DA XLIII EDICIÓN DA RAPA DAS BESTAS NO CURRO DO CANDAOSO

2011-06-20T10:23:00.000-07:00

A PRIMEIRA FIN DE SEMANA DO MES DE XULLO CELÉBRASE NA NOSA PARROQUIA UNHA NOVA EDICIÓN DA RAPA DAS BESTAS NO CURRO DO CANDAOSO.

A próxima fin de semana do 2 de xullo de 2011 as/os veciñas/os da parroquia de Santo André de Boimente celebramos a Rapa das Bestas do Candaoso. Festa declarada de Interese Turístico Nacional que cumpre a súa XLIII edición e unha das máis importantes feiras/festas da Comarca da Mariña Lucense e da súa provincia. Se non tés ningún plan para esa fin de semana, xa te podes apuntar á diversión e ao goce da contorna natural que acolle esta famosa festa. Esperámosvos!

Para todas/os aqueles que estean interesada/os en acudir a esta festa deixámosvos o cartel coa programación de actividades da Rapa das Bestas a desenvolverse ao longo de toda a fin de semana.

A TELEVISIÓN GALEGA (TVG) EMITE O CURSO DE COCIÑA E REPOSTERÍA AO ESTILO TRADICIONAL ORGANIZADO POLA "FRAGA DAS SAÍMAS"

2011-06-14T10:22:00.000-07:00

As mulleres da Fraga das Saímas e alumnas do Curso de Cociña e repostería ao estilo tradicional, organizado pola nosa Asociación o pasado mes de maio, foron grabadas pola TVG durante unha das súas clases prácticas e onte, luns 13 de xuño, foi emitida unha reportaxe sobre este novidoso curso no programa das tardes da TVG " A SOLAINA" .

Se non tivéstedes ocasión de velo aínda tedes a oportunidade agora de velo pinchando no título desta nova ou no seguinte enlace

http://www.crtvg.es/reproductor/inicio.asp?canal=tele&hora=14/06/2011%2016:19:00&fecha=13/06/2011&arquivo=1&programa=A+SOLAINA&id_programa=835&corte=&mp4=0&medio=

Noraboa a todas as cociñeiras!

GRANDE SATISFACCIÓN ENTRE AS/OS PARTICIPANTES DA RUTA DA "FRAGA DAS SAÍMAS" POLA RÍA DE AROUSA E O VERSALLES GALEGO

2011-06-06T11:47:00.000-07:00

As mulleres da asociación Fraga das Saímas, acompañadas da súa parella e familia, gozaron dunha fin de semana envoltas entre os aromas das camelias, hortensias e dun sinfín de prantas dos xardíns do Pazo da Oca e a diversidade de cores da Ría de Arousa, baixo un ceo dun intenso azul que as acompañou ao longo da súa escapada ata o casco antigo da cidade de Pontevedra.

MEDIO CENTO DE MULLERES E VECIÑOS DE SANTO ANDRÉ DE BOIMENTE PARTICIPARON NUNHA RUTA POLA RÍA DE AROUSA, O VERSALLES GALEGO E O CASCO HISTÓRICO DE PONTEVEDRA ORGANIZADA POLA ASOCIACIÓN “FRAGA DAS SAÍMAS”

Este pasado sábado 4 de xuño a Asociación “Fraga das Saímas” viaxou ás Rías Baixas para descubrir a historia e a beleza desde a terra e desde o mar da Ría de Arousa, gozar do “Versalles galego” e do Casco histórico da cidade de Pontevedra, o mellor conservado de Galicia, xunto co de Compostela.

A primeira visita do día foi aos Xardíns do Pazo de Oca (concello da Estrada), tamén coñecido como o Versalles Galego polo seu encanto e a súa extraordinaria beleza. Durante este recorrido as viaxeiras contemplaron extasiadas os belos estanques, fontes e pontes românticas. Descubriron pasadizos, rincóns escondidos...e gozaron coa beleza das hortensias, petunias, camelias, magnolias, tilos, parras, grandes árbores, trepadoras...música de fondo, a frescura da mañá e un sinfín de aromas

Logo desta primeira parada continuaron ata o Grove, onde embarcaron no Novo Delfin para facer unha Ruta en Catamarán pola Ría de Arousa, durante a cal un guía lles explicou o proceso de cultivo dos mexillóns e ostras. Durante esta travesía fixeron unha parada nunha das plataformas de cultivos mariños para degustar mexillóns ao vapor, acompañados dun alvariño. Esta viaxe pola ría durou aproximadamente unha hora e media.

A media tarde, unha vez recuperadas as forzas e logo de dar boa conta dun xantar no Mesón O Xoto (no centro do Grove), o grupo da asociación Fraga das Saímas achegouse a Punta Moreiras para facer unha visita ao Centro de Interpretación da Pesca e a Salga (CIPES). As viaxeiras/os foron recibidas polo Concelleiro de Cultura do Grove (D. Antón Maroño), que lles explicou no transcurso da visita, que durou máis dunha hora, o método de salazón do peixe que se seguía no século XIX, as diferentes artes de pesca da zona, a carpintería da ribeira e na que aproveitou tamén para contarlles a historia mariñeira do Grove.

As mulleres da Asociación Fraga das Saímas aproveitaron a última parada para visitar a cidade de Pontevedra, na que fixeron un roteiro polo casco histórico da cidade, partindo da Alameda e visitando as prazas da Ferrería, Méndez Núñez, A Estrela... e rematando fronte a Igrexa da Peregrina, padroa desta cidade.

TURISMO INDUSTRIAL POLA TERRA CHÁ DAS ALUMNAS DO CURSO DE COCIÑA E REPOSTERÍA

2011-05-29T14:16:00.000-07:00

As alumnas do Iº Curso de Cociña organizado pola Directiva da “Fraga das Saímas” aproveitaron o último día do curso para coñecer os procesos de elaboración do queixo de San Simón e o proceso de tostado de Cafés Candelas “in situ”.

AS MULLERES DA ASOCIACIÓN “FRAGA DAS SAÍMAS” PARTICIPANTES NA Iª EDICIÓN DO CURSO DE COCIÑA E REPOSTERÍA AO ESTILO TRADICIONAL CLAUSURARON ESTE CURSO FACENDO TURISMO INDUSTRIAL POLAS COMARCAS DA TERRA CHÁ E LUGO
Con motivo da clausura do exitoso curso de cociña e repostería ao estilo tradicional, organizado pola Directiva da Asociación “Fraga das Saímas” e ao obxecto de poñer un broche de ouro a esta actividade, onde participaron 19 mulleres entusiastas da cociña, o monitor deste Curso e a Directiva desta asociación planificaron unha viaxe fin de curso para o pasado mércores, 25 de maio.

Logo de máis de 30 horas de curso de cociña e repostería ao estilo tradicional da man do xove cociñeiro Ivan Galdo del Río e con máis de cincoenta recetas de cociña e repostería aprendidas, xunto con máis dun centenar de “trucos dos bruxos da cociña”, quince das dezanove asistentes a esta actividade aproveitaron o último día de clase para desprazarse, en compañía do seu cociñeiro Ivan, ata a Terra Chá e achegarse ata unha das famosas queixerías de San Simón (Vilalba), onde os responsables da fábricas lles explicaron todo o proceso de elaboración e curación do queixo de San Simón e onde ao final da visita as visitantes puideron comprobar as “virtudes deste produto” degustando diferentes tipos de queixo.

Pola tarde e unha vez trasladadas ao Polígono do Ceao, visitaron as instalacións de Cafés Candelas, S.L. empresa ubicada na cidade de Lugo desde o ano 1973. Aquí as viaxeiras descubriron, entre toneladas de café, os segredos do proceso de tostado do grao de café e a historia desta empresa proveedora de café ao sector da hostalería por todo o territorio nacional.

Esta divertida e formativa viaxe quixéronna rematar, as nosas viaxeiras, facéndolle unha visita á famosa “Charca do Alligal” (parroquia de Santaballa - Vilalba) e gozando dun paseo pola súa contorna.

FESTAS PATRONAIS DE SANTO ANDRÉ DE BOIMENTE

2011-05-18T06:24:00.000-07:00

Santo André de Boimente arranca o día de reflexión electoral cunha misa solemne cantada polo Coro Parroquial de Bravos, con motivo da celebración da Festa do Corpus.

A ORQUESTRA PALLADIUM TOCARÁ ESTE SÁBADO 21 DE MAIO NAS FESTAS PATRONAIS DE SANTO ANDRÉ DE BOIMENTE.

As veciñas e veciños de Santo André celebran as súas festas patronais do Corpus o vindeiro sábado 21 de maio.

Esta celebración parroquial comezará ás 13.00 horas cunha misa solemne, que logo de moitos anos e como novidade durante esta ceremonia relixiosa os feligreses poderán deleitarse coas voces do CORO PARROQUIAL DE BRAVOS que interpretarán diferentes temas durante a celebración desta misa.

Logo da procesión terá lugar a sesión vermut coa presentación da nova orquestra Palladium (cuxos componentes formaban parte da orquestra Suavecito).

A festa continuará no adro da Igrexa de Santo André de Boimente a partir das 22.00 horas coas actuacións da Orquestra Palladium e o Trío Sesión.

As veciñas e veciños desta parroquia convidan a todos os viveirenses a celebrar con eles as súas festas patronais e animan á xente que teña gañas de celebrar o “día de reflexión electoral” con baile e diversión a achegarse a San Andrés para gozar con verdadeiros profesionais da música e do canto.

REPRESENTACIÓN TEATRAL EXITOSA NA FESTA DA LINGUA-2011

2011-05-10T11:27:00.000-07:00

O Centro Socio-Cultural de Santo André de Boimente acolleu o pasado sábado 8 de maio a celebración da Festa da Lingua Galega-2011, onde Flor Chao, Presidenta do colectivo de mulleres da Fraga das Saímas, destacou a figura de Rosalía de Castro durante o seu discurso de benvida “... Muller, Poeta e galega comprometida coa nosa lingua e a nosa terra...”

“FRAGA DAS SAÍMAS” CELEBRA COA “FARSA Á ESCOCESA E MATRIMONIO SÉCULO XXI” DO GRUPO DE TEATRO AXOUXERES O DÍA DAS LETRAS GALEGAS-2011.

Esta fin de semana a Asociación de mulleres rurais Fraga das Saímas ven de celebrar os actos conmemorativos da Festa da Lingua 2011.

A partir das 19.00 horas da tarde do sábado, 8 de maio deron comezo os actos organizados pola asociación “Fraga das Saímas” no Centro Socio-Cultural de Santo André de Boimente con motivo da celebración do Día das Letras Galegas-2011.

A festa da Lingua-2011 da Fraga das Saímas comezou coa lectura dun pequeno texto do poeta monfortino, Lois Pereiro, ao que se lle adican este ano o Día das Letras Galegas. Rematada esta lectura a Presidenta, Flor Chao, foi a encargada de dar o discurso de presentación da Festa da Lingua, durante o cal aproveitou para reivindicar o uso da lingua galega para “...poñer en valor o noso patrimonio inmaterial máis prezado...” destacando a figura de Rosalía de Castro “...muller, galega e poeta comprometida coa nosa terra e coa nosa lingua”.

Rematada a intervención da presidenta deuse paso a representación da obra “Farsa á escocesa e matrimonio Século XXI, representada polo grupo teatral Axóuxeres da asociación cultural O Castro de Vilaronte (Foz) e dirixida por Benito García Bolaño. Esta nova obra que o Grupo Axóuxeres está a levar por todo a xeografía lucense ao longo do 2011, tivo unha grande acollida e foi moi aplaudida polos máis de cuarenta e cinco veciños e veciñas, que asistiron á Festa da Lingua, durante os 90 minutos que durou a súa representación.

A festa da Lingua clausurouse cunha chocolatada servida pola Directiva a todas as veciñas e veciños participantes desta festa-homenaxe á lingua. As portas do Centro Socio-cultural pecháronse, nesta ocasión, pasadas as 22.30 horas.

CELEBRACIÓN DA FESTA DA NOSA LINGUA

2011-05-04T08:29:00.000-07:00

CELEBRACIÓN DO DÍA DAS LETRAS GALEGAS-2011

A Directiva da Asociación de Mulleres Rurais Fraga das Saímas, COMUNICA a todas as súas socias e...seguidoras (por suposto que tamén) que con motivo da celebración do DIA DAS LETRAS GALEGAS-2011, este Sábado, o Centro Socio-cultural de Santo André de Boimente, acollerá ao grupo de teatro aficionado AXOUXERES de Foz que representará a comedia teatral " O VELORIO DE XAN PEROLO", dirixida por Benito García. A nosa lingua está de festa! Todas as persoas que queirades compartir con nós esta festa quedades convidadas. A representación teatral comezará ás 19.00 horas. Esperámosvos. Avisar á Directiva.

FELIZ FESTA!

PREMIOS E AGASALLOS, UNHA EXPOSICIÓN CHEA DE CORES, UN BO XANTAR E BAILE, BAILE E MÁIS BAILE...E TODO ISTO EN SANTO ANDRÉ DE BOIMENTE!

2011-05-01T13:55:00.000-07:00

A ENTREGA DOS PREMIOS DO Iº CONCURSO DE FOTOGRAFÍA, ORGANIZADO POLA ASOCIACIÓN “FRAGA DAS SAÍMAS”, TIVO LUGAR DURANTE O ACTO DE INAUGURACIÓN DA EXPOSICIÓN FOTOGRÁFICA: “FRAGA DAS SAÍMAS, MONUMENTO NATURAL”, NO MARCO DA CELEBRACIÓN DA 3ª FESTA DO MEDIO NATURAL E FAMILIA”.

O sábado, 30 de abril, celebrouse no Centro Socio-Cultural de San Andrés de Boimente, a 3ª Festa do Medio Natural e Familia organizada pola Asociación de Mulleres Rurais “ Fraga das Saímas”, a cal tivo como actos centrais a Gala de entrega de premios do Iº Concurso de fotografía sobre a Fraga das Saímas e a inauguración da Exposición fotográfica que leva por título o lema deste concurso: Fraga das Saímas, Monumento Natural.

Os gañadores do Concurso (Francisco López, Estela Insua e Lorena Díaz), así como o cuarto finalista (Carlos Gancedo) acudiron á Gala dos premios deste concurso e á inauguración da exposición itinerante de fotografías, acompañados de amigos e familiares.

A Asociación de MMRR “Fraga das Saímas” tamén contou durante a celebración destes actos coa presencia da Concelleira de Benestar Social do Concello de Viveiro, Isabel Rodríguez, os membros do xurado calificador do concurso fotográfico: a propietaria da firma especializada en material de belas artes (Catá), Josefina Casas e o fotógrafo viveirense Óliver.

Os actos comezaron as 13:30 h. coa intervención da presidenta, Flor Chao, que según as súas propias palabras Coa organización deste Concurso fotográfico da Fraga das Saímas queremos promover dun xeito activo,o respecto e o coidado ao noso patrimonio natural, contribuíndo con isto a concienciar á cidadanía da necesidade de reclamar un cambio de xestión dos sistemas forestais para erradicar a degradación dos nosos montes e garantir a conservación dos ecosistemas naturais”. Durante o discurso dos actos centrais da celebración da 3ª Festa do Medio Natural a Presidenta desta asociación exclamou ante as máis de oitenta socias, veciños e convidados “A inauguración desta exposición fotográfica e a entrega dos premios aos gañadores do concurso de fotografía énchenos de gozo porque hoxe a Fraga das Saímas é un pouco máis coñecida e estamos convencidas de que tamén é un pouco máis querida e respectada e seguro que tamén máis protexida! Cremos que canto máis persoas coñezan a existencia desta fermosa paraxe máis posibilidades temos de poder seguir conservando este Monumento Natural e máis posibilidades hai de que logremos que sobreviva á invasión de especies depredadoras como é a planta de eucalito e ás accións irresponsables do home”.

Durante o acto de inauguración da exposición fotográfica, composta por trinta obras fotográficas seleccionadas de entre as 53 presentadas a concurso, proxectouse o DVD “Fraga das Saímas, Monumento Natural”, onde todos os presentes puideron contemplar unha pequena mostra da beleza desta paraxe a través da proxección de todas os traballos fotográficos presentados a este concurso. Logo de rematada esta proxección as organizadoras do Concurso fixeron acto de entrega dos premios aos gañadores, agasallando tamén aos finalistas cun diploma e o libro “Cabo da vida CORRUBEDO vida do Cabo”.

Rematados os actos centrais da Festa do Medio Natural máis de oitenta invitado deron boa conta do xantar servido polo Restaurante “O Val do Naseiro” e disfrutaron dunha sesión de baile amenizado polo grupo “Dúo Maracuyá” de Ferrol, que foron os encargados de poñer a nota musical a esta día de celebracións, incluído un paseíllo con gaita e acordeón dedicado a todas as nais presentes. Pasadas as nove da noite a 3ª Festa do Medio Natural despidíuse ata o 2012.

INAUGURACIÓN DO Iº CURSO DE COCIÑA E REPOSTERÍA AO ESTILO TRADICIONAL

2011-04-24T13:12:00.000-07:00

“Fraga das Saímas” organiza, con éxito de participación, o Iº Curso de Cociña e Repostería nas instalacións do Hotel-Restaurante O’Val do Naseiro

AGOTADAS AS PRAZAS PARA ASISTIR AO “ Iº CURSO DE COCIÑA E REPOSTERÍA AO ESTILO TRADICIONAL” IMPARTIDO POLO TÉCNICO ESPECIALISTA EN HOSTALERÍA, IVÁN GALDO

A Directiva da asociación de mulleres rurais da parroquia de Santo André de Boimente, ven de poñer en marcha o Iº Curso de cociña e repostería ao estilo tradicional. Unha actividade formativa demandada polas súas socias en numerosas ocasións e que logo de buscar entre todas a fórmula máis axeitada para poder levar a cabo esta actividade, dada a imposibilidade material de impartirse este tipo de cursos no Centro Socio-Cultural de Santo André de Boimente, e unha vez realizadas diversas xestións polas membros da Directiva acordouse a súa celebración nas instalacións do Hotel-Restaurante O´Val do Naseiro, situado na parroquia veciña de San Pedro.

Coa organización deste curso Fraga das Saímas busca contribuír a rescatar o valor patrimonial das recetas tradicionales galegas, aprender sobre a historia gastronómica do noso país, e ao mesmo tempo gozar dun momento agradable e divertido, ou o que é o mesmo “aprender gozando”

Con esta iniciativa a directiva busca ofrecerlles ás dezanove alumnas interesadas no mundo da cociña e os seus segredos, a oportunidade de aprender e/ou ampliar os seus coñecementos culinarios da man do cociñeiro Ivan Galdo del Río, (Técnico especialista en Hostalería).

Ivan Galdo con algunha das alumnas durante a presentación

O curso que ven de inaugurarse o pasado mércores, durante a cal xa se puxo a disposición das asistentes un recetario de cociña elaborado polo mestre de cociña, desenvolverase un día a semana durante os meses de abril e maio, no Hotel-Restaurante O´Val do Naseiro. Este curso ten unha duración total de 30 horas e o seu custo, que inclúe a materia prima, o profesor-cociñeiro, a aula de cociña exclusiva e degustación, será financiado nun 50% pola asociación Fraga das Saímas.

FALLO DO XURADO CALIFICADOR DO Iº CONCURSO DE FOTOGRAFÍA "FRAGA DAS SAÍMAS, MONUMENTO NATURAL"

2011-04-11T00:33:00.000-07:00

A OBRA DE FRANCISCO LÓPEZ LÓPEZ “FERVENCIÑAS DA FRAGA DAS SAÍMAS-3” GAÑADORA DO PRIMEIRO PREMIO DO CONCURSO DE FOTOGRAFÍA “FRAGA DAS SAÍMAS, MONUMENTO NATURAL”, ORGANIZADO POLA ASOCIACIÓN DE MULLERES RURAIS DE SANTO ANDRÉ DE BOIMENTE.

O xurado calificador do Iº Concurso de Fotografía, co lema “Fraga das Saímas, Monumento Natural”, e que a Asociación de Mulleres Rurais de San Andrés de Boimente convocara con motivo da celebración do Día Internacional da Árbore, reuníuse no Centro Socio-Cultural da Asociación MMRR “Fraga das Saímas” este domingo para valorar os 53 traballos presentados por vinte fotógrafos aficionados á natureza e amantes da vida.

Os criterios de valoración, tal e como se recollían nas bases da convocatoria deste concurso, e que os membros do xurado tiveron en conta á hora de examinar e puntuar os traballos presentados polos concursantes foron: a adecuación ao tema do concurso, a creatividade e orixinalidade dos traballos e a calidade técnico artística dos mesmos.

Dos 53 traballos, o xurado acordou descalificar tres obras por non adecuarse ao tema do concurso e logo do estudo das restantes obras o xurado preseleccionou os 30 mellores traballos presentados ao concurso, co obxecto de que formen parte dunha exposición temporal, que comezará no Centro Socio-Cultural de Santo André de Boimente.

O xurado calificador, logo de rematado o proceso de preselección, procedeu a seleccionar as obras finalistas e as gañadoras do concurso, que despois de dúas horas reunidos acordaron por unanimidade conceder o:

PRIMEIRO PREMIO.- consistente en 200 € en metálico e na entrega dun diploma ,a FRANCISCO LÓPEZ LÓPEZ, pola obra titulada Fervenciñas da Fraga das Saímas-3 .

SEGUNDO PREMIO.- consistente en 100 € en metálico e na entrega dun diploma , a ESTELA INSUA AYUSO, pola obra titulada El reflejo del Futuro.

TERCEIRO PREMIO.- consistente en 50 € en metálico e na entrega dun diploma, a LORENA DÍAZ FERNÁNDEZ, pola obra titulada Rama lacrimosa.

O xurado destacou a gran calidade na execución destas obras, que fan visible a beleza serea deste monumento natural, na que logran empregar a conxunción de tres elementos fundamentais para convertir unha obra en arte : a sensibilidade manifestada co medio natural, a súa calidade técnico-artística e a creatividade e orixinalidade.

Os autores das seis obras que quedaron finalistas nesta 1ª edición do concurso de Fotografía Fraga das Saímas” son:

1º Finalista: Miguel Villalba Tomás, coa obra titulada “O ceo na Fraga”

2º Finalista: Francisco López López coa obra titulada “Fervenciñas da Fraga das Saímas-2

3º Finalista: Miguel Villalba Tomás, coa obra titulada “ Árbore”

4º Finalista: Luis Carlos Gancedo García, coa obra titulada: Selvaxe

5º Finalista: Francisco López López, coa obra titulada “Fervenciñas da Fraga das Saímas-1”

6º Finalista: Juan Antonio Fernández Váquez, coa obra titulada “Fervenza e Remuíño”

A entrega de premios e diplomas aos tres gañadores do Iº Concurso de Fotografía “Fraga das Saímas, Monumento Natural”, xunto coa inauguración da exposición temporal das 30 mellores fotografias, realizarase o vindeiro sábado 30 de abril de 2011 no marco da celebración da 4ª edición da Festa do Medio Natural e Familia.

A Directiva da AMMRR “Fraga das Saímas” quere expresar de forma pública o seu agradecemento ás traballadoras do Centro Comarcal da Mariña Occidental (Ana e Melania) pola súa inestimábel axuda e colaboración durante toda a fase de información e presentación dos traballos a este Concurso e sen as cales este proxecto non houbera sido o mesmo. Tamén queremos agradecer a colaboración daquelas institucións públicas, medios de comunicación e asociacións que colaboraron na divulgación desta ilusionante iniciativa. E por último, e dun xeito especial a todas aquelas persoas que participaron nesta 1ª edición do concurso de fotografía, así como ao profesional da fotografía Oliver e a Josefina Casas Ferreiros (CATÁ) que de forma desinteresada aceptaron formar parte do Xurado Calificador.

FESTA DO MEDIO NATURAL E FAMILIA-2011

2011-04-04T11:00:00.000-07:00

AS SOCIAS E VECIÑOS QUE DESEXEN PARTICIPAR NA CELEBRACIÓN DA 3ª FESTA DO MEDIO NATURAL E FAMILIA, QUE VAI TER LUGAR O VINDEIRO 30 DE ABRIL NO CENTRO SOCIO-CULTURAL DE SANTO ANDRÉ, XA PODEN ANOTARSE CHAMANDO Á DIRECTIVA DA ASOCIACIÓN "FRAGA DAS SAÍMAS".

DESCOBRE UNHA COCIÑA DE CALIDADE E SINXELA

2011-03-17T12:33:00.000-07:00

A Asociación Fraga das Saímas aposta por unha cociña de calidade con produtos galegos elaborados ao xeito tradicional.

“FRAGA DAS SAÍMAS” ABRE O PRAZO PARA MATRICULARSE NO SEU Iº CURSO DE COCIÑA E REPOSTERÍA AO ESTILO TRADICIONAL.

A Directiva da asociación de mulleres rurais da parroquia de Santo André de Boimente, ao obxecto de dar cumprimento ao acordado na súa asemblea xeral anual, abre o prazo para as socias do colectivo da Fraga das Saímas e outras persoas interesadas (homes ou mulleres) que desexen participar no Iº Curso de cociña e repostería ao estilo tradicional, para que se matriculen no mesmo antes do remate do mes de marzo. Esta actividade formativa está programada para que dé comezo a primeira semana de abril.

Con esta iniciativa a directiva busca ofrecerlles, a aquelas mulleres da súa asociación e/ou veciñas interesadas no mundo da cociña e os seus segredos, a oportunidade de aprender e/ou ampliar os seus coñecementos culinarios da man do cociñeiro Ivan Galdo del Río, (un xove pero experto profesional da cociña da Mariña lucense).

O curso impartirase os mércores de cada semana durante os meses de abril e maio no Hotel-Restaurante O´Val do Naseiro (San Pedro).

Número máximo de alumnas/ os: 18 persoas

Horario: mércores de 17.00 horas ás 20.00 horas

Duración: 24 horas

Custo total: as alumnas pagarán o 50% do custo do curso e o outro 50% será financiado pola Asociación Fraga das Saímas. Polo que, cada alumna pagará polo curso completo entre 50-60 euros. Este prezo inclúe: materia prima, profesor-cociñeiro, aula de cociña exclusiva e degustación.

O prazo para anotarse rematará o 31 de marzo ou ben no momento en que se cubran as 18 prazas. Déixate guiar polos sentidos e achégate aos segredos dunha das mellores cociñas do mundo.

As persoas interesadas nesta iniciativa poden poñerse en contacto coa Directiva da Fraga das Saímas no teléfono 669250948.

DIA DA MULLER TRABALLADORA

2011-03-14T15:23:00.000-07:00

Mentras as gañadoras do Iº Concurso de disfraces do Entroido-2011, organizado pola asociación Fraga das Saímas, xa disfrutaron esta fin de semana do seu premio a carón da praia de Área as/os participantes do Iº Concurso de Fotografía “Fraga das Saímas. Monumento Natural”, que está a ser organizado tamén polo mesmo colectivo, dispoñen aínda de QUINCE DÍAS para achegarse a esta espectacular paraxe natural, capturar coa súa cámara a beleza deste “Monumento” e presentar as súas mellores fotografías para facerse cun dos tres premios cos que está dotado este atractivo concurso.

“FRAGA DAS SAÍMAS” CELEBRA, XUNTO Á ASOCIACIÓN DE VIÚVAS E MULLERES RURAIS DE CHAVÍN E OUTROS COLECTIVOS DE MULLERES DE VIVEIRO, O DÍA INTERNACIONAL DA MULLER TRABALLADORA.

Esta fin de semana dezaoito mulleres da asociación “Fraga das Saímas”- San Andrés de Boimente, entre as que se atopaban as gañadoras do Iº Concurso de disfraces do Entroido-2011 organizado por esta entidade, desprazáronse en compañía dunha vintena de mulleres da asociación de viúvas e mulleres rurais de Chavín ata Area para celebrar, xunto a numerosos colectivos de mulleres da Mariña lucense (Burela, Vicedo, Viveiro, etc.), o Día Internacional da Muller Traballadora cunha cea-baile no restaurante Louzao, prolongándose esta ata pasadas as tres da madrugada.

A Directiva da “Fraga das Saímas” lembrou ás aficionadas á fotografía que o prazo para participar no Iº concurso de fotografía que estaba a organizar o seu colectivo remata o xoves 31 de marzo e que aínda dispuñan de tempo para achegarse ata os montes do Buio (parroquia de Santo André de Boimente), espazo no que se integra a Fraga das Saímas, para gozar desta paraxe natural e capturar coas súas cámaras a beleza descoñecida desta Fraga e facerse así cun dos tres premios cos que está dotado este singular concurso

Asimesmo, a Directiva aproveitou esta xuntanza lúdica para informar ás súas socias e veciñas amantes das novas tecnoloxías que podían coñecer as últimas novas da asociación no seu blog http://mulleresfragadassaimas.blogspot.com e no recén estreado facebook http://www.facebook.com/people/Fragadassaimas, así como tamén realizar a descarga de documentos e fotografías colgadas no blog da asociación (no apartado de “descarga de documento” e “arquivos fotográficos de actividades”). Por outra banda, animou as veciñas a facerse amigas en Facebook da Fragadassaimas co obxecto de facer desta asociación un colectivo cada vez máis participativo e aberto as súas seguidoras.

Iº BAILE DE FARRAPULGAS "FRAGA DAS SAÍMAS".

2011-03-09T06:35:00.000-08:00

As socias gañadoras do concurso de disfraces celebrado durante o “Iº Baile de Farrapulgas” foron premiadas pola asociación Fraga das Saímas cunha cea-baile que terá lugar o vindeiro sábado 12 de marzo no restaurante Louzao con motivo da celebración do Día Internacional da Muller.

“FRAGA DAS SAÍMAS” CELEBRA O SEU Iº BAILE DE FARRAPULGAS COA PARTICIPACIÓN DE MÁIS DE SESENTA DISFRACES E MÁSCARAS.

En Santo André de Boimente, 8 de marzo de 2011.- A asociación de mulleres rurais “Fraga das Saímas” ven de celebrar por primeira vez o seu entroido, “logo de máis de 55 anos desaparecidas da parroquia de Santo André de Boimente as clásicas máscaras do noso rural que acudían ao Baile do domingo de Lardeiro, no Salón de Boimente, e as pandas de carnavaliños que percorrían as nosas aldeas de casa en casa alegrando os fogares das nosas veciñas e veciños” según palabras pronunciadas pola presidenta deste colectivo durante o acto de presentación do Iª Baile de Farrapulgas.

O Baile, celebrado o domingo 6 de marzo, deu comezo a partir das seis da tarde, momento en que empezaron a chegar: indias, pescadores, mises, damas de época, diaños, monxas, paiasos, bebés, príncipes, elefantiños, paxaros e así ata máis de sesenta disfraces.

As Mulleres, nenos e homes que decidiron aparcar a rutina diaria e asistir a esta festividade con moito humor e grandes doses de inxenio, convertíndose en persoa, animal ou cousa que lles deu a real gana participaron nun concurso de disfraces, onde a directiva, axudada por 10 persoas do público asistente, elixiron por categorías (mulleres, homes e nenos) os disfraces máis orixinais e máis divertidos.

Pero antes das votacións aos mellores disfraces as máis de setenta persoas presentes nesta festividade gozaron do baile amenizado polo Dúo Suso das Pontes e aproveitaron para degustar produtos típicos do entroido elaborados polas mulleres da asociación Fraga das Saímas. Así pois, os asistentes a este evento degustaron fereixós, roscas, orellas, chirivicos e tamén, entre outros, petiscos de tortillas, queixo e chistorra.

Este Iº Baile clausurouse coa entrega dos premios do Concurso de disfraces nas tres categorías. O premio ao disfrace máis divertido, na categoría dos nenos/as, foi para Bianca, que acudiu ao baile cun simpático disfrace de galiña e o premio ao disfrace máis orixinal foi para Bruno cun disfrace de duende verde. Todos os nenos presentes tamén levaron un agasallo por participar nesta tarde de festa. Na categoría dos homes foi Manolo, que ía de hippy, o que levou o premio ao disfrace máis orixinal e Xuxo de Cabanas, que ía de bebé, o que se alzou co premio ao disfrace máis simpático. Premios estes últimos, por certo, pensados en clave de humor e típicos destes tempos de carnaval. Na categoría das mulleres os premios aos disfraces mais divertidos foron para as irmás Eva, Dolores e Mª Carmen e a veciña dos Leás Marisa, todas elas con disfraces de Paiasas e os premios aos disfraces máis orixinais na categoría das mulleres foi para Clarisa, que ía de máscara representando á Primavera e para as irmás Inés e Luisa cunha posta en escea moi orixinal dos famosos persoaxes Mucha e Nucha. As mulleres gañadoras deste concurso foron premiadas pola asociación cunha cea-baile que que terá lugar o vindeiro sábado 12 de marzo no restaurante Louzao con motivo da celebración do Día Internacional da Muller

CELEBRACIÓN DO DÍA INTERNACIONAL DA MULLER TRABALLADORA

2011-03-01T08:57:00.000-08:00

ORGANIZACIÓN DUNHA CEA-BAILE NO RESTAURANTE LOUZAO, O SÁBADO 12 DE MARZO, CON MOTIVO DA CELEBRACIÓN DO DÍA INTERNACIONAL DA MULLER TRABALLADORA.

A directiva da AMRR "Fraga das Saímas" comunica a todas as súas socias que o CIM de Viveiro remitíu invitación as mulleres desta asociación para asistir á Cea-Baile que está a organizarse desde o Concello con motivo da celebración do Día Internacional da Muller Traballadora.

A Cea-Baile, cuxo prezo ascende a 35 euros por "cabeza", terá lugar o vindeiro sábado 12 de marzo no restaurante Louzao e as mulleres interesadas deberán confirmar a súa asistencia chamando por teléfono ao restaurante antes do día 10 de marzo.

As mulleres que decidan acudir poden poñerse en contacto, a maior brevedade posible, coa Presidenta para organizar o tema do transporte. A Concelleira de Cultura transmitíulle á Presidenta que a súa petición de transporte sería atendida.

PUNTO E FINAL ÁS SESIÓNS DE MASAXE DA HOMEÓPATA TRAS DOUS ANOS DE CONSULTAS

2011-03-01T08:38:00.000-08:00

Como todo na vida, o que empeza sempre ten irremediablemente un final. Neste caso un final con bos resultados para moitas das persoas da parroquia de Santo André de Boimente e a súa contorna que acudiron nalgún momento, ao longo destes dous últimos anos, ás sesións da homeópata ferrolana.

FINALIZAN AS CONSULTAS E SESIÓNS DE MASAXE DA HOMEÓPATA QUE VIÑA ACUDINDO AO CENTRO SOCIO-CULTURAL DE SANTO ANDRÉ DE BOIMENTE DESDE O ANO 2009.

A directiva da asociación "Fraga das Saímas" pon en coñecemento de todas as súas socias e veciños da parroquia que a homeópata ferrolana, Loli Fernández, comunicou esta fin de semana á Presidenta da Asociación de Mulleres a súa decisión de non continuar coas súas sesións terapéuticas no Centro Socio-cultural de Santo André de Boimente, que por iniciativa da Directiva da asociación “Fraga das Saímas” viña realizando desde o ano 2009. A homeópata indicoulle á Presidenta deste colectivo que os usuarios que estaban acudindo as súas consultas, a día de hoxe, eran a maioría da zona de Viveiro e a súa contorna polo que decidira trasladar as súas consultas ao Centro Socio-Cultural de San Pedro a partir do mes de marzo.

A directiva agradece o traballo realizado por esta profesional na parroquia de Santo André de Boimente ao longo destes últimos dous anos.

ENTROIDO 2011 "FRAGA DAS SAÍMAS"

2011-02-09T14:25:00.000-08:00

ÁBRESE O PRAZO ÁS SOCIAS, VECIÑAS E CONVIDADOS PARA ANOTARSE E PARTICIPAR NO Iº BAILE DE FARRAPULGAS ORGANIZADO POLA ASOCIACIÓN "FRAGA DAS SAÍMAS"

A Directiva, ao obxecto de organizar o Iº Baile de Farrapulgas con motivo da celebración do ENTROIDO-2011, abre o prazo para anotarse ás socias, veciños e convidados das socias da Fraga das Saímas. Comunícase a todas e todos os interesados en participar nesta GRAN FESTA VECIÑAL que o único requisito IMPRESCINDIBLE para poder asistir a este BAILE POPULAR é que hai que ir disfrazada/o dalgún maneira. OLLO!... NON VALE O DISFRACE DE TODO O ANO!! hai que cambiar de traxe, aínda que só sexa por unha vez no ano.

Este Gran Baile, que non só vai dar que falar a nenos e maiores, terá lugar no Centro Socio-Cultural o domingo, 6 de marzo, de 18.00 horas da tarde ata as 22.00 horas.

Haberá dous premios sorpresa para o disfrace máis orixinal e para o disfrace máis divertido.

Entre peza e peza tamén poderedes degustar as roscas, fereixós, orellas de frade...elaboradas polas socias voluntarias - voluntariosas.

Por último, dicirvos que a data para anotarse remata o 1 DE MARZO, así que xa sabedes se sodes divertidas, atrevidas, amantes da vida e queredes pasar unha tarde alegre e cargada de emocións, DISFRÁZATE DE FARRAPULGAS E ÚNETE A NÓS!

Vémonos no Baile das Farrapulgas! Ata entón, goza do que nos da a vida e das/os amigas/os.

CONVOCATORIA DO Iº CONCURSO DE FOTOGRAFÍA "FRAGA DAS SAÍMAS"-2011

2011-02-01T00:29:00.000-08:00

A DIRECTIVA DE MULLERES RURAIS DE SANTO ANDRÉ DE BOIMENTE CONVOCA O Iº CONCURSO DE FOTOGRAFÍA CO LEMA “FRAGA DAS SAÍMAS, MONUMENTO NATURAL”, DIRIXIDO A TODAS AQUELAS PERSOAS AFICIONADAS OU PROFESIONAIS DA FOTOGRAFÍA, AMANTES DA NATUREZA E RESPETUOSAS COA VIDA.

No marco da celebración do “Día Mundial dos bosques” a directiva da Asociación MMRR “Fraga das Saímas” está a organizar o Iº Concurso de Fotografía da Fraga das Saímas.

Esta iniciativa forma parte dunha serie de actuacións encamiñadas a preservar o patrimonio material e inmaterial da parroquia de San Andrés aprobadas na asemblea xeral anual da asociación e coa cal se pretende fomentar o coñecemento e o gozo deste paraxe natural entre a poboación do concello e os seus visitantes e promover dun xeito activo o respecto e o coidado do noso patrimonio natural. Asimesmo, desde a Asociación Fraga das Saímas, preténdese poñer en valor este monumento natural como fonte de riqueza medioambiental, cultural e social promovendo unha cultura de ocio saudable a través da práctica de “sendeiros de cultura e saúde”.

O tema único do concurso é “Fraga das Saímas, Monumento Natural”, deixando total liberdade para que cada participante exprese a súa creatividade e amose, a través desta, a beleza e a importancia deste paraxe natural e a súa contorna (montes do Buio) ao obxecto de concienciar á poboación da necesidade de fomentar a protección, o respecto e a conservación deste ecosistema.

Poderán participar neste concurso todas as persoas maiores de 18 anos de calquera nacionalidade que residan nalgunha das provincias de Galicia ou do resto do estado español e que sexan aficionadas ou profesionais da fotografía e amantes da natureza e respetuosas coa vida.

As persoas que desexen participar neste concurso poderán recoller as bases do concurso no Centro Comarcal da Mariña Occidental de luns a venres, en horario de 10:00 a 14:00 e de 17:00 a 20:00 horas, descargalas en http://mulleresfragadassaimas.blogspot.com (apartado de "descargas de documentos") ou solicitalas no correo electrónico fragadassaimas@gmail.com

Este concurso esta dotado con 3 premios en metálico, sendo o 1º premio de 200 euros, o 2º premio de 100 euros e o 3º e último de 50 euros.

O prazo para presentar as obras rematará o xoves, 31 de marzo de 2011, ás 20.00 horas.

Unha vez outorgados os premios levarase a cabo una exposición pública das obras gañadoras xunto coas fotografías finalistas seleccionadas polo xurado do concurso.

VEN A DISFRUTAR DESTE ESPECTACULAR PARAXE NATURAL E PARTICIPA. ESPERAMOS AS TÚAS FOTOGRAFÍAS!!

FRAGA DAS SAÍMAS APROBA O PROGRAMA DE ACTUACIÓNS 2011

2011-01-24T00:18:00.000-08:00

O Presuposto da “AMMRR Fraga das Saímas” para o exercicio 2011, aprobado esta fin de semana polas socias desta entidade, ascende a 21.200 euros.

AS MULLERES DA ASOCIACIÓN “FRAGA DAS SAÍMAS APROBAN POR UNANIMIDADE O PROGRAMA DE ACTIVIDADES-2011 NA SÚA ASEMBLEA XERAL ANUAL.

A asociación de mulleres rurais “Fraga das Saímas” ven de celebrar a súa asemblea xeral anual durante a tarde-noite do sábado, 22 de xaneiro, no seu Centro Socio-Cultural de Santo André de Boimente.

Nesta reunión, tras dar conta a secretaria da asociación do estado de ingresos e gastos do ano 2010, as socias aprobaron por unanimidade as contas deste exercicio, así como o programa de actuacións e investimentos, a desenvolver ao longo do ano 2011 pola asociación Fraga das Saímas, proposto pola Directiva.

O programa de actuacións-2011 que aprobou “Fraga das Saímas” e cuxo presuposto ascende a 21.200 euros, divídise nas seguintes liñas de traballo: formación/información, actividades culturais, actuacións para preservar o noso patrimonio material e inmaterial, actividades lúdico-culturais: Cultura e divertimento, e fomento do coñecemento sobre o patrimonio natural, histórico e artístico de Galicia mediante visitas “in situ” guiadas.

Entre as actuacións novidosas aprobadas co voto favorable de todas as socias cabe sinalar: a celebración do entroido-2011, coa organización do Iª Baile de Farrapulgas. O deseño, maquetación e edición do Catálogo “O espello das Lembranzas”, onde se recollerán máis de 100 fotografías cedidas polas veciñas, costumes sociais, ritos de carácter relixioso, a formación, celebracións populares, cantigas, refráns, etc...das xentes de Santo André de Boimente das décadas comprendidas entre os 40-80. Así como tamén, cabe destacar a organización do Iº Concurso de Fotografía “Fraga das Saímas” ao obxecto de pór en valor e dar a coñecer o noso máis prezado Patrimonio como é a Fraga das Saímas.

A sesión foi pechada coa intervención da presidenta que expresou a súa satisfacción polo traballo desenvolto ao longo do ano 2010 por unha directiva que soubo facer fronte a dificultades de moi diversa índole e pola participación entusiasta das súas socias e veciños. E manifestou ante a súa asemblea que esperaba que as administracións fixesen un maior esforzo que o do exercicio pasado. Así espera que se lles dé a posibilidade de participar ás pequenas asociacións, como o caso da Fraga das Saímas, en programas específicos que afecten ao ámbito da muller e que deberían poñer en marcha novamente a administración autonómica e local ao obxecto de mellorar a calidade de vida da muller do rural.

Unha vez rematada a reunión as asistentes puideron degustar dun chocolate con churros e disfrutar coa proxección dunha película na sá de cinema que ten acondicionada o Centro Socio-Cultural. A velada rematou pasadas as 10.30 da noite e cunha temperatura por debaixo dos 3º graos.

ASEMBLEA XERAL ANUAL DA AMMRR "FRAGA DAS SAÍMAS"

2011-01-11T12:04:00.000-08:00

CONVOCATORIA DA ASEMBLEA XERAL ANUAL DA ASOCIACIÓN DE MULLERES RURAIS "FRAGA DAS SAÍMAS"

Ponse en coñecemento de todas as socias da asociación Fraga das Saímas da celebración da Asemblea xeral anual desta asociación.

A presidenta, en virtude das facultades que lle confire o artigo 15 dos Estatutos da Asociación de mulleres rurais Fraga das Saímas convócaa á ASEMBLEA XERAL ORDINARIA que terá lugar no Centro Social de San Andres de Boimente, o SABADO, 22 de XANEIRO de 2011, ás 17:00 HORAS en primeira convocatoria e, de ser o caso, ás 17:30 HORAS en segunda convocatoria, para debater e tomar acordos sobre os seguintes asuntos da orde do día:

Primeiro: Aprobación, se procede, da acta da asemblea anterior.

Segundo: Dar conta de altas e baixa de socias.

Terceiro.- Dar conta do estado de ingresos e gastos do exercicio 2010 e aprobación, se procede, do mesmo.

Cuarto.- Aprobar, se procede, o Programa de actividades e investimentos e o Orzamento anual de ingresos e gastos para o exercicio 2011.

Quinto: Suxestións e preguntas.
Esperamos que podades acudir o maior número de socias a esta reunión, posto que é de interese para a boa marcha da asociación que tomemos entre todas os acordos necesarios para a aprobación do programa de actuacións a desenvolver ao longo do 2011.

Asimesmo informámosvos que ao remate desta asemblea, as socias poderán gozar coa proxección dunha película e uns petiscos.

Anímate e axúdanos a mellorar esta asociación: acude á asemblea do sábado 22 de xaneiro! Esperámoste!

ÉXITO DE PARTICIPACIÓN NO FESTIVAL DE NADAL -2010 "FRAGA DAS SAÍMAS"

2010-12-20T13:19:00.000-08:00

A ACTUACIÓN “ELEGANTE E INTIMISTA” DO DÚO DE MÚSICA FOLK “TONECHO CASTELOS&PABLO ESQUEIRA” CAUTIVOU AO PÚBLICO ASISTENTE AO IIº CONCERTO DE NADAL “FRAGA DAS SAÍMAS-2010”

O sábado 18 de decembro a Asociación de mulleres rurais “Fraga das Saímas” pechou o seu programa de actividades 2010 coa celebración do Festival de Nadal-2010. Unha cita anual xa consagrada e convertida nun “ritual de casi obrigado cumprimento” para as socias, veciños da parroquia e convidados da asociación.

Este Festival-2010, organizado pola Directiva con gran esforzo, ilusión, gañas e co desexo de que facer sentirse HOXE aquí aos asistentes como nunha gran familia, según palabras da propia presidenta da asociación durante o acto de benvida, comezou ás 18:30 h. no Centro Socio-Cultural de San Andrés de Boimente coa actuación dos reputados músicos de folk, o coruñés Tonecho Castelos &Pablo Esqueira, viveirense de nacemento.

Estes dous mestres da música ofrecéronnos un espectáculo musical cargado de ritmos tradicionais e folk con composicións propias, cautivando, coa complicidade dun fermoso diálogo entre un violín e un acordeón, a un público asistente totalmente entregado, ao mesmo tempo que engadían diferentes instrumentos e a súa voz durante o seu elegante e intimista repertorio que se alongou máis dunha hora.

Concluído este excepcional concerto, e que a Directiva quixo adicar dun xeito especial á memoria das súas socias finadas, o centenar de asistentes que quixeron compartir este ritual de despedida anual, xunto coa asociación Fraga das Saímas, foron convidados a unha cea de confraternidade que comezou ás 20.30 h., onde os comensales deron boa conta do catering servido polo Mesón O Imperial e onde non faltou tampouco durante o postre a degustación dos produtos típicos do nadal servidos pola Directiva.

Durante a cea a Presidenta da Asociación “Fraga das Saímas”, Flor Chao, aproveitou para felicitar, as festas de Nadal e expresar os mellores desexos para o 2011 a todas as súas socias e convidados. Durante a súa intervención agradeceu , a todas aquelas socias que co seu entusiasmo, coa súa participación e a súa colaboración en todos e cada un dos proxectos desenvoltos pola Directiva, fixeron posible que a Asociación chegara con éxito á meta un ano máis e aproveitou para felicitalas publicamente pola súa vitalidade, ilusión e esa alegría que nos transmiten e nos dá forzas para continuar coas rendas desta asociación un ano máis e á espera de poder contar, a curto prazo, cun relevo xeracional que nos recolla o testemuño e continúen coa boa marcha desta asociación.

Durante os postres a directiva efectuou un sorteo de tres espléndidas cestas de nadal. Nesta ocasión a fortuna foi a parar ás mans do veciño Manolo Lestegás, que se levou a 1ª cesta e ás mans das socias: Olimpia Rouco Fraga e Elva Martínez Cao, que a fortuna as agasallou coa 2ª e 3ª cesta respectivamente. Tampouco se olvidou a Directiva dos máis pequenos que asistiron a esta festa navideña, posto que tamén recibiron o seu agasallo de nadal.

A celebración alongouse ata as 2.00 h. da madrugada, na que os convidados máis animados bailaron ao ritmo da música do viveirense Moncho Fernández.

PRAZAS POLA SOLIDARIEDADE

2010-11-25T08:23:00.000-08:00

O fomento da autoestima e a concienciación da propia muller, a través de accións formativas, unha fórmula para loitar contra a violencia de xénero.

“FRAGA DAS SAÍMAS” SUBVENCIONARÁ CINCO PRAZAS PARA ASISTIR AO CURSO DE ANIMACIÓN CULTURAL E DEPORTIVA, QUE SE ESTÁ A IMPARTIR NO SEU CENTRO SOCIO-CULTURAL, DESTINADAS A MULLERES VECIÑAS DE VIVEIRO.

O Centro Socio-Cultural de San Andrés acolleu, o xoves 25 de novembro, ás alumnas e socias da Fraga das Saímas que quixeron adicar parte da tarde en recordar ás mulleres vítimas da violencia machista realizando unha concentración solidaria, durante a cal se repartiron libretas entre as presentes e lazos de cor lila en sinal do rexeitamento da violencia contra as mulleres.

Outra das iniciativas que acordou a Directiva da Asociación “Fraga das Saímas”, con motivo da celebración dos actos conmemorativos Día Internacional en contra da Violência de xénero, é subvencionar ao 50% o custo de 5 prazas do curso de animación cultural e deportiva que se imparte no seu Centro Socio-Cultural os martes e xoves de cada semana, co obxecto de ofrecerlles a posibilidade de asistir a esta actividade formativa a aquelas mulleres, que non pertencen á asociación MMRR Fraga das Saímas, que sexan veciñas de calquera das parroquias do concello de Viveiro.

As mulleres interesadas en participar nesta acción formativa poderán poñerse en contacto nos vindeiros días coa presidenta da asociación no telefono 669 25 09 48

O prazo para incorporarse a este curso rematará ao cubrirse as 5 prazas que estarán subvencionadas ao 50% durante un período máximo de 3 meses.

Con estas iniciativas a asociación, que está a servir de instrumento para darlle voz a muller da súa comunidade veciñal, quere convertir o centro socio-cultural de San Andrés de Boimente nun verdadeiro espazo de encontro para as mulleres, tanto socias como veciñas do concello de Viveiro, onde a través de cursos como o de animación cultural e deportiva podan compartir tempo, espazo e vivencias, lles sirva para concienciarse da importância do seu papel na sociedade e no mercado laboral, non só como amas de crianza ou amas de casa, así como impulsar o fomento da autoestima de todas as mulleres que se acheguen a este Centro.

CONCERTO DE NADAL "FRAGA DAS SAÍMAS"

2010-11-22T00:20:00.000-08:00

Os ritmos tradicionais da música Folk do dúo Tonecho Castelos& Pablo Esqueira soarán no Concerto de Nadal-2010 que está a organizar a Directiva da asociación de mulleres rurais "Fraga das Saímas".

O concerto de Nadal-2010 "Fraga das Saímas", que correrá a cargo dos reputados músicos Tonecho Castelos (A Coruña) e o viveirense Pablo Esqueira, celebrarase no Centro Socio-Cultural de San Andrés de Boimente, o sábado 18 de decembro, ás 18.30 h.

As persoas interesadas en asistir, tanto ao concerto como ao Festival de Nadal, que se celebrará o mesmo día, poden poñerse en contacto coa Directiva da Asociación.

Programación de actos do Festival de Nadal:

18.30 h. Concerto de Nadal
20.00 h. Cea de confraternidade
21.30 h. Sorteo de 3 cestas navideñas
22.00 h. Baile amenizado pola música de O Pìndaro

Non esperes máis e APÚNTATE XA!. A diversión está garantizada! O prazo para anotarse remata o 12 de decembro de 2010.

AVELINO GONZÁLEZ, UN CONTADOR DE HISTORIAS QUE TRIUNFOU NA 3ª EDICIÓN DO MAGOSTO "FRAGA DAS SAÍMAS"

2010-11-15T12:05:00.000-08:00

Máis de oitenta mulleres, convidados e veciños de San Andrés, asistentes á 3ª Edición do Magosto “Fraga das Saímas, encheron o salón de actos do Centro Socio-cultural de San Andrés, para presenciar a contada do actor Avelino González e a representación dun fragmento teatral das alumnas do curso de animación cultural e deportiva que está a impartir a asociación “Fraga das Saímas”.

Na tarde do sábado 13 do presente mês a Asociación de Mulleres Rurais “Fraga das Saímas” celebrou no Centro Socio-Cultural da parroquia de San Andrés de Boimente a súa 3ª edición do Magosto: Toma Castañas!. Edición que contou coa colaboración da área de Cultura da Deputación de Lugo.

A xornada de troula desta 3ª festa magosteira comezou ás 18.30 h. co discurso de benvida de Flor Chao, presidenta da Asociación Fraga das Saímas, que según palabras da mesma: Coa celebración desta 3ª edición do Magosto “Fraga das Saímas” e que xa supón a consolidación da recuperación dun dos rituais máis ancestrais dos nosos antepasados celtas e con maior arraigo nestas terras do norte, queremos honrar á filla do Castiñeiro que acompañou case a diario, en tempos difíciles e non tan lonxanos, as mesas de tantos fogares galegos e que tanta fame quitou aos nosos antepasados.

Durante máis dunha hora, e tras pasarlle o relevo a presidenta da Fraga das Saímas, o actor vigués Avelino González, coñecido actualmente polo persoaxe de “Miñato” que interpreta na serie galega “Padre Casares”, fixo as delicias dos asistentes, que non deixaron de rir nin de aplaudir a este actor de cine, teatro e amante do circo.

Unha vez rematada a contada deste actor capaz de facerlle sentir todo tipo de sensacións ao seu público menos o aburrimento, as socias-alumnas do curso de animación cultural e deportiva tamén quixeron amosar as súas dotes interpretativas representando un fragmento de 10 minutos da peza teatral “O anano Antón pechugón” de autoría propia . A Dirección correu a cargo da monitora Lorena Díaz, e a interpretación a cargo das socias Ester Lorenzo e Olga Rodríguez, que foron despedidas ao remate da súa representación novel con efusivos aplausos das súas compañeiras e convidados.

Concluídas estas actuacións, as máis de oitenta socias, veciños e convidados participantes nesta festa magosteira deron boa conta das castañas asadas, chourizos e lacón asado que a Directiva da Fraga das Saímas tiña preparado para a ocasión.

Esta tarde-noite de festa e de troula rematou pasadas a 1.00 h. da madrugada, despois de que os máis festexeiros estiveran bailando durante máis de dúas horas, sen parar, ao ritmo do grupo musical Dúo Suso das Pontes.

FRAGA DAS SAÍMAS SOLIDARÍZASE COS VECIÑOS DE MAGAZOS AFECTADOS POLO CAMBIO DE TRAZADO DA VARIANTE DE VIVEIRO

2010-11-08T14:21:00.000-08:00

A ASOCIACIÓN “FRAGA DAS SAÍMAS” APOIA A REIVINDICACIÓN DAS VECIÑAS E VECIÑOS DE MAGAZOS AFECTADOS POLO CAMBIO DE TRAZADO DA VARIANTE DE VIVEIRO AO PASO POLA SÚA PARROQUIA.

A Directiva da AMMRR “Fraga das Saímas” reuníuse na tarde do sábado, 6 de novembro, co obxecto de tomar, entre outros, o acordo de apoiar a reivindicación das veciñas e veciños de Magazos afectados polo cambio de trazado do proxecto aprobado da V.A.C. (variante de Viveiro), ao paso pola súa parroquia.

A Directiva da Fraga das Saímas, de forma unánime, acordou manifestar o apoio ás súas veciñas e veciños da parroquia de Magazos na súa loita contra o cambio no trazado da VAC ao paso por esta parroquia. O Acordo tomado por escrito e asinado por todas as membros da directiva, trasladouselle aos representantes da Comisión de veciños afectados de Magazos.

A Directiva da Fraga das Saímas manifesta o seu rexeitamento ao cambio de trazado do proxecto aprobado da V.A.C. San Cibrao-O Barqueiro, tramo Celeiro-Viveiro Sur, ao paso pola parroquia de Magazos que de forma sorpresiva e arbitraria a Dirección Xeral de Infraestruturas da Consellería de Medio Ambiente, Territorio e Infraestruturas da Xunta de Galicia parece estar intentando querer impoñer ás veciñas e veciños de Magazos, afectados directos, e ás veciñas e veciños das restantes parroquias do municipio viveirense, que continuaremos sofrindo estoicamente día tras día os atascos e as penalidades para cruzar Viveiro por mor de non estar nin se quera iniciada a execución a día de hoxe, e visto o visto, nin con visos de executarse nun futuro cercano, a V.A.C. San Cibrao-O Barqueiro, nos subtreitos de Covas-Viveiro Sur e Viveiro Sur-Celeiro, e incomprensiblemente a pesares de que este trazado xa fora aprobado por unanimidade por todos os membros da corporación do concello de Viveiro e co respaldo e consenso dos veciños, alá polo ano 2006.

Cremos que todos os cidadáns deberíamos ter as mesmas oportunidades para mellora-las nosas condicións de vida con independência da aldea, vila, cidade ou capital na que escollamos ou nos toque vivir, polo que non nos parece de recibo que as Administracións Públicas que recaudan , administran e xestionan os nosos impostos decidan de forma unilateral cambiar, como é neste caso, un proxecto primordial para as nosas comunicacións viarias e o desenvolvemento futuro do municipio viveirense, menoscabando o sentir xeral dos veciños e os acordos tomados polo concello de Viveiro, que entendemos goza de personalidade xurídica plena e cuxa autonomía ten garantizada pola Constitución española, supoñemos que como calquera outra administración local.

A Directiva da Fraga das Saímas suscribe as alegacións presentadas, á Dirección Xeral de Infraestruturas, polas veciñas e veciños de Magazos ao cambio de trazado da V.A.C. ao seu paso por esta parroquia e demanda da Xunta de Galicia a rectificación do trazado proposto pola súa Consellería de Medio Ambiente, Territorio e Infraestruturas e a aceptación das alegacións dos veciños de Magazos e reitera, en aras do interese xeral de todos os veciños de viveiro a petición de inicio das obras da variante de Viveiro aprobada no seu día polo Concello e os veciños.

COMPARTE O NADAL-2010 E A SORTE COA ASOCIACIÓN "FRAGA DAS SAÍMAS"

2010-11-02T12:10:00.000-07:00

O NÚMERO 37.562 DE SEGURO QUE SERÁ O NÚMERO AFORTUNADO DO SORTEO DESTE NADAL

A LOTARÍA DE NADAL-2010 DA ASOCIACIÓN "FRAGA DAS SAÍMAS" XA ESTÁ A DISPOSICIÓN DAS SÚAS SOCIAS E SEGUIDORES!

Queridas socias e fieles seguidores agora a sorte está nas vosas mans! Queres compartir este Nadal-2010 con nós e participar dunha experiencia conxunta que nos pode levar a facer realidade algún dos pequenos soños das nosas vidas?? A Directiva da Asociación "Fraga das Saímas" quere axudarvos a conseguir eses dóces soños e por iso pon á venta exclusivamente 200 participacións de 5 euros cada unha (donativo:1€) do número 37.562.

Todas as socias teñan preferencia para facerse con algunha destas 200 participacións.

COMPRA O TEU NÚMERO ANTES DE QUE SE ESGOTEN!

A DIRECTIVA NON COMPRARÁ MÁIS LOTARÍA DA QUE DISPÓN (200 PARTICIPACIÓNS) NIN RESERVARÁ PARTICIPACIÓN ALGUNHA!!

2010-10-25T14:02:00.000-07:00

O CENTRO SOCIO-CULTURAL DE SAN ANDRÉS DE BOIMENTE ACOLLE O CURSO DE ANIMACIÓN DEPORTIVA PROGRAMADO POLA AMMRR “FRAGA DAS SAÍMAS”

O pasado 21 de outubro deu comezo o curso de Animación Deportiva no Centro Socio-Cultural de San Andrés de Boimente, organizado pola Directiva da Asociación de MRR Fraga das Saímas.

Coa organización desta actividade a Directiva pretende impulsar, entre as súas asociadas e veciñas, a práctica de programas de exercicio físico combinado cun traballo de estimulación da memoria co obxecto de axudar a prevenir e a mellorar déficits nos aspectos cognitivos das alumnas participantes.

Este curso estase a impartir pola Técnica superior en animación de actividades físico-deportivas, Lorena Díaz, todos os luns e xoves, en horario de 7 a 8 da tarde, no Centro Socio-Cultural de San Andrés de Boimente.

O programa de actividades que se está a desenvolver pola monitora incorpora o Método de motricidade e memoria para maiores cuxa práctica de traballo implica a combinación de:

1º.- Técnicas corporales en movemento e estratexias de intervención na memoria motriz.
2º.- Actividades cognitivas de aula nas que se realizarán diferentes exercicios de atención e memoria.

Asemade, unha vez ao mês estas clases estarán adicadas á práctica do CACHIBOL, coa que as asistentes descubrirán os beneficios para a súa saúde física e psicosocial que entraña a práctica deste deporte coñecido polos profesionais como o deporte da eterna xuventude.

Por outra banda, as mulleres de San Andrés non só participan neste curso de animación deportiva, senón que algunhas o compaxinan co taller de manualidades que se está a impartir no Centro Socio-Cultural os xoves de 16.00 h. ás 19.00 h.

A directiva anima a todas as súas veciñas e veciños a participar neste curso que de seguro lles traerá maior benestar e un aumento da súa calidade de vida. Así pois aquelas mulleres e homes que desexen participar neste curso e compartir un espazo e un tempo côas mulleres da asociación “Fraga das Saímas” poderán poñerse en contacto coa Directiva no telefono 669 25 09 48

O DELEGADO DE CULTURA DA DEPUTACIÓN DE LUGO ASISTE Á INAUGURACIÓN DA EXPOSICIÓN PERMANENTE "O ESPELLO DAS LEMBRANZAS"

2010-10-18T01:02:00.000-07:00

O Deputado nacionalista e Delegado de Cultura da Deputación de Lugo, Don Antón Veiga, durante a a súa intervención suliñou que co traballo de asociacións coma o da “Fraga das Saímas” e o apoio econômico da Área de Cultura da Deputación de Lugo estase a contribuír a dignificar o modo de vida da xente do rural galego.

EXITOSA INAUGURACIÓN DA EXPOSICIÓN PERMANENTE “O ESPELLO DAS LEMBRANZAS” E DA MOSTRA DE TRABALLOS MANUALES DAS SOCIAS-ALUMNAS DA ASOCIACIÓN “FRAGA DAS SAÍMAS”.

O Centro Sócio-Cultural de San Andrés de Boimente acolleu na tarde do sábado, 16 de outubro, a inauguración dunha exposición de fotografias antigas que reflexan as vidas dos membros da comunidade veciñal de San Andrés de Boimente e que leva por título “O Espello das Lembranzas”, así como tamén acolleu a Iª mostra de traballos manuales das socias-alumnas da Asociación Fraga das Saímas que elaboraron durante os últimos meses nos talleres de manualidades, arte floral e cestería organizados por esta asociación.

A Exposición de fotografias antigas forma parte do proxecto O Espello das Lembranzas e conta coa colaboración económica da Área de Cultura da Deputación de Lugo. Este proxecto púxose en marcha a comezos de ano póla Directiva da Fraga das Saímas coa colaboración de 17 mulleres que demostraron o seu entusiasmo e apoio a esta iniciativa a través da cesión de 150 fotografías antigas, dos anos entre 1940 e 1980.

O acto comezou ás 18.00 h. coas intervencións da presidenta Flor Chao, o Deputado-Delegado de Cultura da Deputación de Lugo, Antón Veiga e a Concelleira de Benestar Social do Concello de Viveiro, Isabel.

Según as palabras da Presidenta da Asociación durante a súa intervención a exposición de O ESPELLO DAS LEMBRANZAS, baixo o lema “UNHA HOMENAXE Á XENTE DA COMUNIDADE VECIÑAL DE STO. ANDRÉ DE BOIMENTE” intenta resumir o fin último perseguido pola nosa asociación ( é dicir preservar o noso patrimonio máis prezado: A HISTORIA DA NOSA XENTE), amosando a través de 72 fotos distribuídas en 12 paneis temáticos unha realidade familiar e social propias dun pasado duro, difícil pero tamén entrañable e irrepetible.

O deputado nacionalista, Antón Veiga, felicitou á Asociación póla súa labor social e amosou o seu apoio a este tipo de iniciativas, subliñadondo que co traballo de asociacións coma o da Fraga das Saímas e o apoio econômico da Área de Cultura da Deputación de Lugo estase a contribuir a dignificar o modo de vida da xente do rural galego.

Durante este acto tamén tivo lugar a inauguración da Iª MOSTRA DOS TRABALLOS MANUALES das socias-alumnas máis pro-activas e participativas da Asociación que co seu esforzo, traballo e a complicidade das súas monitoras, en especial da monitora do taller de manualidades Pilar, elaboraron verdadeiras obras de artesanía. Así os asistentes puideron admirar espectaculares centros e cadros minimalistas compostos no taller de arte floral, xogos de mantelerías, puntillas a ganchillo, bolillos feitos no taller de manualidades, ademais das cestas, servilleteiros ou botelleiros, entre outros, que as socias aprenderon a confeccionar durante o curso de cestería impartido por profesionais do Centro de Artesanía e Deseño de Lugo.

A exposición O Espello das Lembranzas pasará a formar parte de forma permanente do día a día do Centro Socio-Cultural de San Andrés e a Mostra de traballos manuales permanecerá nas instalación deste Centro do 18 a 24 de outubro.

Tra-lo remate da inaguración os máis de sesenta asistentes foron convidados a un viño galego acompañado duns pinchos, prolongándose a velada ata pasadas as 23.00 h. onde os amantes do cine tamén puideron disfrutar cunha película que a Directiva proxectou como broche final dun día cargado de emocións para a comunidade veciñal.

INAUGURACIÓN DA EXPOSICIÓN "O ESPELLO DAS LEMBRANZAS"

2010-10-04T09:19:00.000-07:00

O ESPELLO DAS LEMBRANZAS.Unha homenaxe á xente de Santo André de Boimente.

A Asociación MMRR Fraga das Saímas inaugura o vindeiro sábado de 16 de outubro unha exposición de fotografías antigas dos veciños de Santo André de Boimente que forma parte do proxecto O ESPELLO DAS LEMBRANZAS e á cal, a Directiva da asociación, CONVIDA a asistir a todas as súas socias e veciños da comunidade veciñal de Santo André de Boimente.

A Inauguración desta exposición terá lugar ás 18.00 h. no Centro Socio-Cultural de Sto. André de Boimente. Asimesmo expoñerase unha Mostra dos traballos manuais elaborados durante os últimos meses polas socias-alumnas do taller de manualidades e cestería organizados por esta Asociación.

As persoas interesadas en ter máis información poden poñerse en contacto coa Directiva da Asociación e tamén a través do correo electrónico: fragadassaimas@gmail.com

CLAUSURA DO CURSO DE CESTERÍA IMPARTIDO POR PROFESIONAIS DO CENTRO DE ARTESANÍA E DESEÑO DE LUGO

2010-09-24T10:34:00.000-07:00

A Asociación Fraga das Saímas aposta por recuperar e preservar os oficios tradicionais que conforman o extenso patrimonio artesanal galego.

A Directiva da AMMRR “Fraga das Saímas”, en colaboración co Centro de Artesanía e Deseño da Deputación de Lugo, ven de organizar, no seu Centro Socio-Cultural, un curso de Cestería tradicional de 10 horas de duración, no que participaron máis de vinte alumnas.

Un dos obxectivos principais que se persegue, desde a Asociación, con este tipo de iniciativas é contribuír a impulsar a recuperación, a conservación e o mantemento dos ofícios tradicionais do noso país, como é a cestería neste caso, e que conforma o rico patrimonio artesanal de Galicia.

Este curso, dividido en dous grupos dunhas 10 alumnas cada un, acolleu a vinte e unha alumnas que ao longo de tres xornadas formativas (14, 17 e 21 de setembro) aprenderon da man de dúas profesionais do Centro de Artesanía de Lugo a confeccionar diferentes tipos de cestas, servilleteiros e botelleiros, entre outros, empregando médula de roten, pranta de orixe asiático que pola súa versatilidade facilita o seu manexo entre as participantes para aprender as técnicas básicas do oficio de cestería.

A clausura do curso de cestería, celebrada o pasado 21 de setembro ás 19.00h no Centro Socio-Cultural de San Andrés, estivo a cargo da Presidenta da Asociación Fraga das Saímas. Durante o acto Flor Chao agradeceu o apoio recibido polo Centro de Artesanía e Deseño de Lugo para a realización deste taller e destacou o enorme interese suscitado entre as súas socias por estas xornadas formativas, suliñando tamén o componente social que supón a posta en práctica deste tipo de actividades, posto que ademais da formación que adquiren as alumnas, a moitas delas, ábreselles a oportunidade de compartir un espazo común que facilita as interrelacións persoais. O acto de clausura pechouse coa entrega duns agasallos ás monitoras do curso, María e Carmen, por parte das alumnas, como mostra de cariño e felicitación pola súa profesionalidade.

A DIRECTIVA ABRE O PRAZO PARA ANOTARSE NO CURSO DE CESTERÍA

2010-08-16T02:20:00.000-07:00

FRAGA DAS SAÍMAS ORGANIZA EN COLABORACIÓN CO CENTRO DE ARTESANÍA E DESEÑO DA DEPUTACIÓN DE LUGO UN CURSO DE CESTERÍA PARA AS SÚAS ASOCIADAS.

Se queres aprender a confeccionar diferentes tipos de cestas dun xeito artesanal, a AMMRR “Fraga das Saímas” e o Centro de Artesanía e Deseño de Lugo ofrecémosche agora unha oportunidade a través deste curso de 10 horas de duración que se vai a celebrar no mes de decembro.

O número de prazas son 20 , polo que Chama á Directiva e apúntate antes de que se esgoten as prazas!

Moi importante: Poderán asistir a este curso as 20 primeiras socias que se inscriban chamando ao Tfo. 669250948. En caso de que non se cubran todas as prazas poderán asistir tamén as mulleres veciñas de Viveiro que estean interesadas no mesmo e o houberan solicitado á Directiva da Asociación.

IIª EDICIÓN DA SARDIÑADA DO CANDAOSO

2010-08-11T07:22:00.000-07:00

Exitosa participación das mulleres de Sto. André de Boimente na Sardiñada do Candaoso organizada pola Asociación Fraga das Saímas.

A ASOCIACIÓN “FRAGA DAS SAÍMAS” ORGANIZAN A IIª EDICIÓN DA SARDIÑADA DO CANDAOSO CON MOTIVO DA CELEBRACIÓN DO “DÍA DA SOCIA”

O pasado sábado 7 de agosto as mulleres da Asociación Fraga das Saímas, acompañadas das súas familias, participaron nunha xornada de convivencia organizada pola Directiva, con motivo da celebración do DÍA DA SOCIA.

Nesta ocasión e por segundo ano consecutivo as socias desprazáronse ata o Candaoso para festexar o Día da Socia disfrutando nun marco incomparable dunha sardiñada, da música, da familia e dun día soleado e inmellorable para os paseos que os máis deportistas se deron polas veredas dos montes do Buio e da Fraga das Saímas unha vez rematado o xantar.

A xornada comezou a mediodía, onde as membros da Directiva e varios voluntarios preparon, unha sardiñada con cachelos para 70 socias, familiares e convidados, ademais doutros produtos gastronômicos (chicharros lañados, panceta, criollos, etc.), non faltando para os asistentes postre, cafés e licores.

A media tarde, e como tampouco podiamos prescindir da música nesta ocasión tan especial, sumóusenos a esta celebración o músico viveirense Hortensio Gómez, máis coñecido como o home-orquestra, que coa súa grande habilidade musical e humana logrou conquistar a todos alí presentes. Esta IIª Edición da Sardiñada do Candaoso rematou pasadas as 21.00 horas, logo de cantar e bailar ata cansar as socias e veciños máis festexeiros.

A IGREXA DE STO. ANDRÉ DE BOIMENTE

2010-07-19T12:52:00.000-07:00

As orixes e descrición do Templo

A orixe da Igrexa de Sto. André de Boimente fíxase no ano 862, como indica unha inscrición que hai na pena que serve de cimentación ao templo e que está a poucos metros da porta principal.

A igrexa foi reconstruída nos séculos XVI e XX (ano 1929). A comezos do século XXI, entre os anos 2007 e 2008 desenvolveuse un proxecto de rehabilitación integral desta igrexa. Sendo este proxecto impulsado e financiado pola propia comunidade veciñal de Sto. André de Boimente. Actualmente estanse desenvolvendo os traballos de rehabilitación do pórtico anexo á Igrexa. Obra esta última tamén promovida e financiada polas veciñas e veciños de Sto. André.

Descrición do templo:
A fachada principal foi totalmente refeita e dividida en tres tramos por pilastras unidas ao muro. Nos laterais: dúas xanelas enmarcadas por pequenos arcos. No tramo central: porta de arco escarzano e ventá con arco. Remate: con torre-campanario coroada cunha pequena cúpula e ornamentación de pirámides. Aos lados do cruceiro, dúas portas e nos muros laterais, dous contrafortes e ventas enmarcadas con arcos.

O interior do templo consta de nave de cruz latina, cun arco faxón, capela maior con dúas sacristías adosadas a esta e un cruceiro.

Pavimento moderno na capela maior e de pedra na nave e no cruceiro. Teitume moderna.

No prebisterio: retábulo maior de estilo rococó, con figuras de San Lorenzo e San Pedro do século XVIII, no primeiro corpo, e no segundo a figura de Santo André.

A mesa de altar: estilo rococó

Nos brazos do cruceiro: retábulos, tamén de estilo rococó, un adicado á Virxe do Rosario e outro a Dolorosa. E no brazo dereito: camarín do século XVIII con San Xosé.

CELEBRACIÓN EXITOSA DA 42ª EDICIÓN DA RAPA DAS BESTAS DO CANDAOSO BAIXO UNHA INTENSA NÉBOA

2010-07-08T06:09:00.000-07:00

A COMUNIDADE VECIÑAL DE STO. ANDRÉ DE BOIMENTE CELEBROU DURANTE A FIN DE SEMANA A 42ª EDICIÓN DA RAPA DAS BESTAS DO CURRO DO CANDAOSO NOS MONTES DO BUIO. (SÁBADO, 3 DE XULLO DE 2010)

A pesar da intensa néboa que cubríu a Mariña Occidental durante a fin de semana, as veciñas e veciños de Sto. André de Boimente celebraron a 42ª edición da Rapa das Bestas co mesmo entusiasmo e ilusión de todas as edicións pasadas. Esta celebración prolongouse ata o domingo a noitiña. O sábado a mediodía, as veciñas da parroquia e visitantes achegáronse ata a explanada do curro do Candaoso para celebrar un xantar no que degustaron polbo, carne ao caldeiro e xelado. Rematados os postres, os máis animados e os amantes da música disfrutaron co ritmo do grupo "Luna Nueva". Esta festa prolongouse ata a medianoite.

Xa na madrugada do domingo, a iso das 6.30 h, avanzando entre a espesa néboa que cubría os cumios dos montes do buio, os propietarios das manadas, mozos da parroquia e arredores adentráronse no monte para baixar ata o curro os cabalos, dos que hai máis de 60 de pura raza galega e cerca de 200 de cruce, e as vacas, que permaneceron nun recinto pechado situado xunto o curro, para a súa exhibición durante a rapa. Unha vez rematada esta labor de equipo, os sufridos madrugadores tomaron as típicas sopas con allo para repoñer as forzas e así poder dispoñerse a iso das 11.00, a reproducir o ritual ancestral da loita entre o home e a besta, no que os mozos se empregaron a fondo para poder domar os cabalos co obxecto de marcalos e raparlles as súas crins. Rematado o espectáculo da doma, marcado e rapa das bestas, un ano mais e como é habitual na Rapa do Candaoso, os visitantes puideron asistir á loita de garañóns que reproduce no curro como os machos alfa pelexan polo control da manada.

En torno á “Rapa das Bestas do Candaoso, declarada Festa de Interese Turístico Nacional, organízase unha auténtica romaría que a convirte nunha manifestación claramente festiva. Así os visitantes puideron aproveitar para facer diversas compras nos máis de 2o postos de venta montados ao largo de toda a explanada do curro. Postos de venta de produtos de alimentación (pan de carral, cereixas do Bierzo...), de roupa e calzado, de xoguetes e bisutería, de produtos artesáns (cestos...), etc.. e non faltou tampouco a presenza dunha pequena mostra-exposición de maquinaria agrícola.

Os milleiros de persoas que acudiron a esta festa-romaría non só gozaron dunha espectacular contorna natural das máis envexables e coa celebración dunha das tradicións galegas máis ancestrais, que se remonta á idade de bronce, senón que tamén puideron aproveitar para comer cos amigos e familia nun dos tres "botiquíns" montados na explanada do Curro do Candaoso para esta festa tan especial.

A partir das 17:30 horas e despois de que a xente xa tivera tempo para xantar e descansar, a festa continuou no Candaoso coas competicións (de andadura, de cabalos do país e trotóns) e a carreira equina, con exemplares do país e cruzados e rematou coa xa famosa carreira de burros. Os premios repartidos entre todos os gañadores das distintas categorías ascenderon a uns 810 euros.

Xa para clausurar a 42º edición da rapa das bestas a xornada do domingo rematou cunha verbena que durou ata pasadas as once da noite, amenizada por dous grupos musicais.

Parabéns a toda a comunidade de veciñas e veciños de Sto. André de Boimente por preservar e impulsar unha das festas con máis tradición e sona da nosa comarca.

DÍA DA SOCIA "FRAGA DAS SAÍMAS"

2010-06-29T03:35:00.000-07:00

ÁBRESE O PRAZO PARA PARTICIPAR NA CELEBRACIÓN DO DÍA DAS SOCIAS QUE TERÁ LUGAR O SÁBADO 7 DE AGOSTO.

A Directiva da Asociación Fraga das Saímas informa que está a organizar a IIª Edición do "Día das Socias" para o sábado 7 de agosto.

Programa:

A partir das 14.00 h. Sardiñada
17.00 h-19.00 h. Actuación do home-orquestra (Hortensio)

Todas as socias interesadas deberán inscribirse antes do 30 de xullo.

A cuota "simbólica" é de 2 € para as parellas das socias parroquiais e 3 € tanto para as socias interparroquiais como para os seus acompañantes.

APÚNTATE XA E DISFRUTA DO DÍA DAS SOCIAS NUN DOS CONTORNOS MÁIS FERMOSOS DA MARIÑA!

DESCUBRINDO A COMARCA DA SIDRA E AO OVIEDO HISTÓRICO-MEDIEVAL

2010-05-31T00:42:00.000-07:00

A ASOCIACIÓN “FRAGA DAS SAÍMAS” VIAXA AO PRINCIPADO DE ASTURIAS PARA DESCUBRIR OS SEGREDOS DA COMARCA DA SIDRA E GOZAR DO OVIEDO HISTÓRICO-MEDIEVAL.

As mulleres da Asociación “Fraga das Saímas”, acompañadas polos seus familiares, descubriron os segredos da elaboración da Sidra El Gaitero e gozaron dunhas espectaculares paraxes naturais con vistas ao Cantábrico e dun dos maiores museos escultóricos públicos.

O sábado 29 de maio a Asociación “Fraga das Saímas” viaxou ata a Comarca da Sidra e o Oviedo histórico-medieval, terra de contrastes e paisaxes que espertan os sentidos, para descubrir e admirar a súa riqueza monumental, paisaxística e gastronómica.

A visita comezou nas adegas da Sidrería “El Gaitero”, situada na capital da Comarca da Sidra (Villaviciosa). Durante a visita ás súas instalacións un guía explicou o proceso completo de elaboración das distintas marcas de sidra e as variedades de mazás empregadas. Ao final do percorrido polas adegas da sidrería, e despois de degustar unha sidrina, o grupo de 55 persoas achegáronse a ver a Colección Permanente de El Gaitero, onde alberga a historia da empresa fundadora desta Sidrería.

Despois de coñecer un pouco mellor os segredos da bebida por excelencia dos astures o grupo viaxou ata Lastres para contemplar desde o mirador de San Roque o deseño de construción das súas casas, as praias e as espectaculares paisaxes deste famoso porto mariñeiro.

Para rematar a mañán o grupo trasladouse pola estrada local que vai pegada á ría de Villaviciosa para chegar ata outro dos máis famosos portos de pescadores de Asturias: Tazones. Neste pequeno porto pesqueiro, declarado Coxunto Histórico Artístico do Principado de Asturias no 1991, o grupo da asociación “Fraga das Saímas” aproveitou, antes de xantar no mesmo centro de Tazones, para pasear polas súas estreitas rúas e gozar contemplando o seu caserío popular e para buscar as pegadas dalgún dinosaurio bípede nos pedreiros da súa praia, posto que nesta zona atópase un dos maiores xacementos de pegadas de dinosauros do Xurásico de toda Europa.

Recuperadas as forzas, os viaxeiros marcharon cara a Oviedo: Nesta incursión á capital do Principado de Asturias o grupo gozou contemplando a xoia da cidade: a Catedral de San Salvador e comprobaron porque se di de Oviedo que é un gran museo escultórico público. Durante a visita ao Oviedo Medieval e Histórico admiraron a beleza das súas prazas (Porlier, Trascorrales, Fontán) e dos seus edificios máis emblemáticos ( Pazo dos Condes de Toreno, Valdecarcena-Heredia, Capela da Balesquida, o edificio histórico da Universidade, etc.), para rematar a súa visita á carón do Parque de San Francisco, un dos epicentros da vida social ovetense e o seu principal pulmón.

Nesta viaxe, onde participaron 55 socias e familiares, tamén participou Yanira Díaz, a nena gañadora do 1º premio da Edición-2010 do Concurso de debuxo e pintura da Fraga das Saímas organizado pola Asociación con motivo do Día Internacional da árbore.

FRAGA DAS SAÍMAS CELEBRA O DÍA DAS LETRAS GALEGAS

2010-05-17T11:31:00.000-07:00

A ASOCIACIÓN MMRR “FRAGA DAS SAÍMAS” CELEBRA O DÍA DAS LETRAS GALEGAS COA PROXECCIÓN DA PELÍCULA PRADOLONGO E AGASALLA AOS ASISTENTES CO CD “CANCIÓNS PARA ANTÍA” DO GRUPO FOL DO VENTO.

A Directiva da AMMRR “Fraga das Saímas” ven de organizar días pasados dúas actividades lúdico-culturais con motivo da celebración do Día das Letras Galegas. Así as socias e veciños de San Andrés de Boimente puideron gozar coa proxección da película “Pradolongo”.

A Directiva proxectou este filme galego o pasado sábado 15 de maio, ás 20.00 h., nun dos espazos do Centro Socio-Cultural de San Andrés de Boimente que a Asociación ten habilitado como sá de cinema.

Despois da proxección da película, a Directiva da Fraga das Saímas ofreceulles aos asistentes uns petiscos e churros con chocolate, dos cales todos deron boa conta. Esta agradable velada rematou ás once e media da noite, momento en que a Directiva aproveitou para agasallar ás socias e veciños cun exemplar do CD “Cancións para Antía”, do grupo Fol do Vento, pola súa participaron na celebración do Día das Letras Galegas e co obxecto de que puideran gozar escoitando, xunto ás súas netas e netos, este CD de música en galego para nenas e nenos.

Asimesmo e con motivo da celebración do Día das Letras Galegas, días pasados, a Directiva enviou como agasallo, aos catro centros de ensino público de primaria do Concello de Viveiro e as ANPAs dos mesmos, dous exemplares do CD “Cancións para Antía” a cada un dos centros e ANPAs, co obxecto de contribuír a preservar o noso patrimonio inmaterial máis prezado e a fomentar o uso desta lingua secular na educación escolar infantil e nas actividades de lecer para os máis pequenos, na crenza de que a música é un dos vehículos transmisores que poden axudar a promocionar e a salvagardar a lingua galega e a dos nosos ancestrais.

CLAUSURA DO TALLER DE ARREGLOS FLORAIS SECOS

2010-05-10T05:33:00.000-07:00

A asociación ven de rematar o taller de arreglos florais secos que lles impartíu ao longo do mes de abril a propietaria da floristería Loli (Covas).

Neste taller matriculáronse once socias, as cales tiveron oportunidade, ao longo das 10 horas que durou este taller, de aprender as técnicas de elaboración de centros e xarróns para a decoración nos fogares, o manexo das frores secas para a composición de cadros e tamén aprenderon a interpretar e poñer en práctica as técnicas do Minimalismo floral.

As alumnas mostraron a súa satisfacción aínda que lles soubo a pouco as 10 horas que durou o curso.

GALA DE ENTREGA DOS PREMIOS DO II CONCURSO DE DEBUXO E PINTURA "UN PASEO POLA FRAGA DAS SAÍMAS"

2010-04-26T06:32:00.000-07:00

A DIRECTIVA DA ASOCIACIÓN “FRAGA DAS SAÍMAS” FIXO ENTREGA DOS PREMIOS DO IIº CONCURSO DE DEBUXO E PINTURA INFANTIL “UN PASEO POLA FRAGA DAS SAÍMAS” DURANTE A CELEBRACIÓN DA “II FESTA DO MEDIO NATURAL E FAMILIA”.

O sábado 24 de abril celebrouse, no Centro Socio-Cultural de San Andrés de Boimente, a IIª Festa do Medio Natural e Familia organizada pola Asociación de Mulleres Rurais “ Fraga das Saímas”, no que tivo como acto central a Gala de entrega de premios do IIº Concurso de debuxo e pintura “Un paseo pola Fraga das Saímas", Concurso financiado pola Área de Cultura da Deputación de Lugo.

Os nenos gañadores do Concurso de debuxo e pintura (Yanira Díaz, Isai Parapar, Paula García, Pedro José Chao, Gabriel Timiraos e Elena Rey) así como alguns dos doce nenos finalistas acudiron a esta Gala acompañados polos seus familiares e os directores dos CEIP Santa Rita de Galdo, Lois Tobío de Viveiro e Antonio Pedrosa Latas de Celeiro.

A Asociación de MMRR “Fraga das Saímas” tamén contou durante esta celebración coa presencia da Concelleira de Benestar Social do Concello de Viveiro, Isabel Rodríguez, a 1ª Tenente de Alcalde, María Loureiro e a propietaria da firma especializada en material de belas artes (Catá), Josefina Casas.

Os actos desta celebración comezaron as 13:00 h. coa intervención da presidenta, Flor Chao, que según as súas propias palabras coa celebración da “Festa do Medio Natural e Familia” e a IIª Gala de entrega de Premios “Un paseo pola Fraga das Saímas” a Asociación de Mulleres quixo poñer un broche de ouro ás actividades que, con motivo da conmemoración do Día Mundial da Árbore, organizara para as nenas e nenos do Concello de Viveiro co fin de fomentar o coñecemento do contorno no que viven a través do seu achegamento á natureza e ao medio rural, así como incentivar a participación de todos os veciños do concello no enriquecemento do patrimonio natural da nosa parroquia. A presidenta durante a súa intervención aproveitou para presentar as socias e convidados o proxecto que está a traballar a Directiva grazas a colaboración de 17 veciñas e que leva por nome O Espello das Lembranzas. Para a presentación deste traballo, do cal a presidenta recalcou que se trataba dunha homenaxe á xente da comunidade veciñal de San Andrés, a Directiva da Asociación proxectou un audiovisual de 25 minutos nos cales se recolleron 140 anacos da historia dos veciños da parroquia vividos durante os anos 1940 e 1980.

Despois da proxección deste audiovisual, as membros da Directiva da Asociación, a concelleira de Benestar Social e a propietaria de Catá fixeron acto de entrega dos premios aos nenos gañadores do Concurso de debuxo e pintura. Os 12 finalistas tamén foron agasallados cun diploma e con brúxulas, camisetas, libretas e gorras donadas polo Plan de dinamización da Costa da Morte e Terras do Ulla e Tambre. Pola súa parte, a Presidenta entregoulle aos colexios colaboradores unha figura de cerámicas O’Regal e 18 exemplares do conto infantil “faragulliñas” para cada un deles, agradecendolles a súa participación neste concurso e alabou o traballo e a creatividade dos rapaces. Asimesmo animou a todos os nenos a achegarse á Fraga das Saímas para pasear e gozar da súa beleza sen olvidarse de respetala e coidala.

Rematados os actos centrais da Festa do Medio Natural o centenar de invitados puideron disfrutaron dun xantar servido polo Restaurante “O Val do Naseiro” e dunha sesión de baile amenizado polo grupo musical “Dúo Son Latino” de Arteixo, onde os máis animados bailaron e se divertiron ata pasadas as nove da noite.

COMEZO DO TALLER DE ARREGLOS FLORAIS SECOS

2010-04-12T00:10:00.000-07:00

ÁBRESE O PRAZO PARA A INSCRICIÓN NO TALLER DE ARREGLOS FLORAIS SECOS ORGANIZADA POLA ASOCIACIÓN “FRAGA DAS SAÍMAS” DE SAN ANDRÉS DE BOIMENTE.

A Directiva da AMMRR “Fraga das Saímas” acaba de abrir o prazo para inscribirse no Taller de arreglos florais secos, actividade formativa programada para desenvolverse ao longo da primaveira.

O obxectivo deste taller é lograr que as alumnas aprendan e perfeccionen o manexo das frores secas, descubrindo que as posicións e texturas reaccionan de maneira moi particular e diferente á composición do deseño floral fresco.

A Directiva entende que o seu carácter rústico abre un campo moi extenso na área de decoración de residencias, oficinas e hoteis, entre outros, polo que o desenvolvemento deste taller permitirá que as alumnas asistentes podan ampliar os seus coñecementos frorais para chegar a interpretar tamén outras necesidades estéticas de grande utilidade e demanda.

O taller estará dividido en varios módulos nos que se tratará, entre outros, as seguintes materias:

- Elaboración de centros e xarróns para a decoración nos fogares.

- Aprendizaxe do manexo das frores secas para a composición de cadros.

- Minimalismo floral.

A duración do taller, que será impartido polos dous profesionais que dirixen a Floristería Loli, terá unha duración de 10 horas e realizarase os martes de 15:30 a 18:30 horas, no Centro Socio Cultural de San Andrés de Boimente. O taller comezará o MARTES, 13 DE ABRIL.

Para participar nestas actividades haberá que anotarse previamente, podendo inscribirse nas mesmas calquera socia da asociación Fraga das Saímas ou veciño de San Andrés, así como tamén aquelas mulleres do concello de Viveiro que estean interesadas nalgunha destas actividades e desexen compartir un espazo común de aprendizaxe e lecer. As persoas interesadas poden poñerse en contacto coa presidenta, Flor Chão, no teléfono 669250948.